France Press болон dpa зэрэг гадаадын томоохон мэдээллийн агентлагуудын орон нутгийн цагаар 7-ны өдөр мэдээлснээр, Оросын сөнөөгч онгоц өнгөрөгч 5-ны өдөр Хар тэнгисийн дээгүүр Европын холбооны хилийн харуулын ажил үүргээ гүйцэтгэж байсан Польшийн армийн нисэх онгоцонд саад учруулсан талаар онцолжээ.
Польшийн хилчдийн мэдээлснээр Оросын сөнөөгч онгоц ямар нэгэн радио холбоогүйгээр Польшийн эргүүлийн онгоцноос 5 метр орчим зайд ойртон ирж, урдуур нь хөндлөн нисэх зэргээр үйл ажиллагаа явуулахад ихээхэн саад учруулсны улмаас тус онгоц хэсэг хугацаанд удирдлага болон өндрөө алдсан байна.
Тухайн үед эргүүлийн онгоц нь Румыны хилийн албаныхны хамт Европын Холбооны нутаг дэвсгэрээс гадуурх хилийн хяналтын байгууллага болох Frontex-ийн ээлжит ажил үүргээ гүйцэтгэж байсан бөгөөд онгоцонд хоёр нисгэгч, гурван Польшийн хилчин байсан юм. Азаар ямар нэгэн осол болоогүй байна.
Румыны Батлан хамгаалах яамны зүгээс энэхүү хэрэг явдал Румыны агаарын орон зайгаас зүүн тийш 60 километрийн зайд орших Хар тэнгисийн дээр олон улсын агаарын орон зайд болсон бөгөөд "ОХУ-ын тал Хар тэнгист өдөөн хатгах үйл ажиллагаа явуулж буйн нотолгоо юм” хэмээн мэдэгдэв.
Өнгөрөгч гуравдугаар сарын 14-ний өдөр ажиглалтын үүрэг гүйцэтгэж байсан АНУ-ын Агаарын цэргийн хүчний нисгэгчгүй онгоц руу Оросын армийн онгоц ойртон үйл ажиллагаанд нь саад учруулан эцэст нь сүйрүүлсэн явдал гарч байсан билээ.
Эх сурвалж: MBC
