Пүрэв гарагийн орой Украины Агаарын хүчин өөрсдийн нисгэсэн дроныг буудан унагахаас өөр аргагүй нөхцөлд оржээ. Учир нь дрон Киев хотын төв хэсэгт нисэж байхдаа хяналтаас гарсан байна. Улмаар ерөнхийлөгчийн ордны ойролцоо 15-20 минутын турш дэлбэрэлт сонсогджээ.
Үйл явдлын хүрээнд Украины Ерөнхийлөгчийн Тамгын Газрын дарга Андрий Ермакын зүгээс дроныг дайсны талаас нисгэсэн гэж байсан ч төдөлгүй тус улсын агаарын хүчнээс дроныг тэд өөрсдөө нисгэсэн байснаа хүлээн зөвшөөрсөн юм. Харин яагаад дроныг буудан унагах болсныг тодруулахад тэдний хэлснээр дрон хяналтаас гарсан тул таагүй үр дагаварт хүрэхээс нь өмнө тус арга хэмжээг авсан гэжээ.
Агаарын хүчнээс мэдэгдсэнээр, “Bayraktar TB2 загварын нисгэгчгүй нисэх төхөөрөмж төлөвлөгөөт нислэгийн үеэр оройн 20:00 цагийн үед Киевийн бүсэд хяналтаас гарсан. Нисгэгчгүй нисэх төхөөрөмж улсын төв цэгт, агаарт хяналтаас гарах нь таагүй үр дагаварт хүргэж болох тул бидний зүгээс дроныг буудан унагасан. Дрон газардахад осолдож, шархадсан хүн үгүй.
Харамсалтай хэдий ч энэ бол технологи, ийм зүйлс болдог. Дрон хяналтаас гарсан нь гарцаагүй технологийн доголдлоос үүдэлтэй ч шалтгааныг тодруулахаар ажиллаж байгаа” гэсэн юм.
Эх сурвалж: BBC
