Оросын эрх баригчид лхагва гарагийн үдээс хойш Кремль рүү хоёр нисгэгчгүй онгоц халдлага үйлдсэн гэж мэдэгдсэн. Гэсэн ч уг үйл явдлын дүрс бичлэг нь шөнийх байв.
Кремлийн хэвлэлийн алба энэ үйл явдлыг "ерөнхийлөгчийн амь насанд халдах оролдлого" гэж нэрлэсэн ч Путин шөнийн цагаар Кремльд байх магадлал туйлын бага.
Кремль бол Оросын хамгийн сайн хамгаалалттай объектуудын нэг юм. Москва дотор Кремлийн нисгэгчгүй онгоцноос хамгаалах систем илүү өргөн хүрээтэй байдаг. Түүний бүтэц бүрэлдэхүүний талаар мэдээлэл хомс боловч 1-р сард нисгэгчгүй онгоцтой тэмцэх зориулалт бүхий "Pantsir-S1" агаарын довтолгооноос хамгаалах системийг хотын төвийн эргэн тойрон дахь барилгуудын дээвэр дээр суурилуулж эхэлсэн.
Түүнчлэн Москваг бүхэлд нь хамгаалсан агаарын довтолгооноос хамгаалах илүү өргөн хэлхээ холбоо байдаг.
Харин бодит байдлаас харахад жижиг дронууд агаарын довтолгооноос хамгаалах системийг даван туулж, Москва мужид хүрч чаддаг. Тухайлбал, Москва мужид тэсрэх бодис бүхий дрон илэрсэн дор хаяж хоёр тохиолдол мэдэгдэж байгаа бөгөөд 2-р сарын сүүлээр Коломенскийн дүүрэгт, 4-р сарын сүүлчээр Ногинскийн ойролцоо энэ дронуудыг унагаж байв. Энэ хоёр тохиолдолд нисгэгчгүй онгоцны хэлтэрхийнүүд нь Украины "Укржет" компанийн үйлдвэрлэсэн UJ-22 агаарын дрон болох нь тогтоогджээ.
Энэ төрлийн нисгэгчгүй онгоцнуудын нислэгийн алслалт нь 800 км хүртэл байдаг тул хэрэв Украинчууд тэднийг Кремль рүү хөөргөсөн гэж үзвэл техникийн хувьд үүнийг хийх боломжтой. Дээрхи хоёр үйл явдлын дараа олон тоймчид Оросын агаарын довтолгооноос хамгаалах системийг жинхэнэ довтолгооноос өмнө шалгаж байгаатай ижил төстэй явдал гэж мэдэгдэж байв.
Хэдий тийм боловч Украиных гэж үздэг нисгэгчгүй онгоцууд Оросын агаарын довтолгооноос хамгаалах тэр бүх системийг даван туулж, Москвагийн төв рүү хүрч чадахгүй гэдэг нь илүү бодитой бөгөөд үнэмшилтэй юм.
ОХУ-ын эрх баригчид үүнд Украиныг буруутгаж, бүр В.Зеленскийг хороох, эсвэл тусгай ажиллагаанд илүү хүчтэй зэвсэг хэрэглэх тухай яаран сандран мэдэгзддэж байгаа бол Украины тал "Бид зөвхөн өөрийнхөө нутаг дэвсгэр дээр л тэмцэж байна" хэмээн мэдэгдэв.
Д.Песков сүүлд хийсэн мэдээллээрээ энэ халдлагад АНУ-ыг буруутгасан бөгөөд "Ийм үйлдэл, террорист халдлагын шийдвэрийг Киевт биш, харин Вашингтонд гаргаж байгааг бид маш сайн мэднэ" хэмээн мэдэгджээ.
Харин Америкийн Дайн судлалын хүрээлэнгийн шинжээчид Кремль рүү дроноор дайрсан явдлыг зохион байгуулалттай "жүжиг" гэж үзэх хандлагатай байна.
Эх сурвалж: ВВС болон бусад
