Хууль зүйн үндэсний хүрээлэнг татан буулгах агуулгатай УИХ-ын тогтоолын төслийг өнөөдрийн /2023.05.04/ УИХ-ын чуулганаар эцэслэн баталлаа.
Энэ тогтоолын төслийг Хууль зүйн байнгын хороогоор хэлэлцсэн байгаа. Харин УИХ-ын гишүүн Б.Энхбаяр эсэргүүцэв. “Хэн санаачилж, хэзээ УИХ-д өргөн барьсныг мэдэхгүй байна” гэсэн нь анхаарал татна. Гэвч Б.Энхбаяр өөрөө Хууль зүйн байнгын хорооны дарга. Тэгэхээр тогтоолын төсөл байнгын хороогоор ороход Б.Энхбаяр байхгүй байсан болж таарч байна.
Мэдээллээр бол, Б.Энхбаяр гишүүнийг Үндсэн хуулийн цэцийн хуралдаанд сууж байх хооронд Хууль зүйн байнгын хороогоор тус тогтоолын төслийг хэлэлцжээ. Иймд байхгүй хооронд нь хэлэлцүүлсэн дүр зурагтай.
Үүнтэй холбогдуулж Б.Энхбаяр гишүүнээс гадна Монголын хуульчдын холбоо эсэргүүцсэн мэдэгдэл гаргаж, хуульч Б.Гүнбилэг, Ч.Өнөржаргал нар нүүр хуудастаа байр сууриа илэрхийлээд байна.
Засгийн газраас Хууль тогтоомжийн тухай хуульд нэмэлт өөрчлөлт оруулах тухай хуулийн төслийг боловсруулаад байгаа. Үүнд хуулийн хэрэгжилтийн үр дагаврыг Хууль зүйн үндэсний хүрээлэн үнэлэх тухай заалт багтсан. Мөн тус хүрээлэнгийн дүрмийг Засгийн газрын гишүүн батлах зохицуулалттай. Энэ агуулгатай хуулийн төслийг УИХ хэлэлцэн баталсан байгаа.
Тэгсэн мөртлөө Хууль зүйн үндэсний хүрээлэнг татан буулган тогтоолын төсөл араас нь ийн өргөн барьсан явдал зөрчил дагуулж байгаа юм.
Үүний дараа гэвэл, олон улсын шинжтэй гэрээний асуудал хөндөгдөж байна.
Тодруулбал, Хууль зүйн үндэсний хүрээлэнг Монгол Улс ба Олон улсын хөгжлийн Ассоциаци хооронд байгуулсан зээлийн гэрээний хүрээнд байгуулж байжээ. Гэрээнд хүрээлэнгийн статусыг баталгаажуулсан заалт бий. Тэгвэл, энэ гэрээ 2041 онд дуусах зохицуулалттай.
Үүний дээр Хууль зүйн үндэсний хүрээлэн нь Засгийн газраас боловсруулж буй хуулийн төслүүдэд хяналт тавьдаг, эндээс чанартай хуульчид олон төрөн гарсныг салбарынхан нь онцолж байна.
Мөн Хууль зүйн үндэсний хүрээлэнгийн газрыг авахын тулд ийм шийдвэр гаргалаа хэмээн УИХ-ын гишүүн Б.Энхбаяраас эхлэн байр сууриа илэрхийлж байгаа юм.
Тогтоолын төсөлд Хууль зүйн үндэсний хүрээлэнг УИХ-ын сургалт, судалгааны төвд нэгтгэхээр тусгасан байна.
Үүнтэй холбогдуулж, АН-ын гишүүн, ХЗДХ-ийн сайд асан Х.Тэмүүжин УИХ-ын дарга Г.Занданшатарыг Үндсэн хуулийн цэцэд өгнө гэдгээ мэдэгдлээ.
