НАТО ирэх онд Японд төлөөлөгчийн газраа нээх бодолтой байна. Энэ тухай лхагва гарагт Японы Nikkei сонин мэдээлэв.
Тус төлөөлөгчийн газар нь харилцааны чиг үүргийг гүйцэтгэх бөгөөд үүгээр дамжуулан НАТО-гийн орнууд болон Япон улс аливаа асуудлаар зөвлөлдөх боломжтой гэж тэмдэглэв. Тус эвслийн бүс нутаг дахь бусад холбоотон орнууд, тухайлбал, Өмнөд Солонгос, Австрали, Шинэ Зеланд ч Токио дахь төлөөлөгчийн газар буюу Харилцааны албаар дамжуулан зөвлөлдөх уулзалтад оролцох боломжтойг онцолжээ. Хэвлэлийн мэдээлснээр, холбогдох шийдвэрийг 6-р сарын 11-12-нд Вильнюс хотод болох НАТО-гийн дараагийн дээд хэмжээний уулзалтаас өмнө албан ёсоор батлах бололтой.
Харин оффисыг ирэх жил нээхээр төлөвлөж байна. НАТО-гийн ийм ижил төстэй харилцааны оффисууд одоогоор Нью-Йорк, Вена, түүнчлэн Гүрж, Украинд байрладаг гэж Японы сонин тэмдэглэжээ.
Сүүлийн үед Япон улс Хойд Атлантын холбоотой хамтын ажиллагаагаа идэвхтэй өргөжүүлж байна. Өнгөрсөн жил Ерөнхий сайд Фумио Кишида НАТО-гийн дээд хэмжээний уулзалтад оролцсон Японы анхны засгийн газрын тэргүүн болсон юм. Үүний дараа Японы ГХЯ НАТО-д бие даасан төлөөлөгчийн газар ажиллуулж, Брюссель дэх Элчин сайдын яамнаас нь салгаж, төлөөлөгчийн газрын статусыг өсгөх шийдвэр гаргажээ.
Тодотгоход, АНУ-ын санаачлагаар байгуулагдсан Энэтхэг, Австрали, АНУ, Япон улсыг багтаасан Энэтхэг-Номхон далайн бүс нутгийн "QUAD" холбоо, Австрали, Их Британи, АНУ-ын хамтран үүсгэн байгуулсан "AUKUS" зэрэг цэрэг-улс төрийн блокууд НАТО-той нэгдэж байна гэж Шинэ Дели хотноо болсон ШХАБ-ын гишүүн орнуудын Батлан хамгаалахын сайд нарын уулзалтын үеэр ОХУ-ын Батлан хамгаалахын сайд Сергей Шойгу мэдэгдэж байв.
Эх сурвалж: ИТАР-ТАСС
