Эрүүл мэндийн сайд С.Чинзориг Засгийн газрын хуралдаанд хэлэлцүүлсэн асуудлаараа мэдээлэл хийлээ.
Тэрээр "Эрт илрүүлэг арга хэмжээг эхлүүлснээс хойш нэг жилийн хугацаа өнгөрлөө. Энэ хугацаанд 29.6 хувь нь хамрагдсан. 45.1 хувь нь эрэгтэйчүүд, 54.9 хувь нь эмэгтэйчүүд байна. Байршлаар нь авч үзвэл 50.1 хувь нь Улаанбаатар, 49.9 хувь нь орон нутагт амьдарч байгаа иргэд байна. Хамрагдсан иргэдийн 60.5 хувьнь 0-17, 39.5 хувь нь 18-аас дээш насны иргэд. Иргэдээ эрт илрүүлэг ононшлогоонд идэвхтэй хамруулах зорилгоор Эрүүл мэндийн сайд, Боловсрол, шинжлэх ухааны сайд нар төсвийн багцдаа өөрчлөлт оруулж эрүүл мэндийн даатгал төлдөггүй оюун залуусыг хамруулах тогтоолыг Засгийн газраас баталсан.
Мөн аймгийн нэгдсэн эмнэлгүүдэд ходоодны дуран хангалтгүй байгааг өөрчилж нэмэхээр ажиллаж байна. Ингэснээр эрт илрүүлэг, оношлогоонд хамрагдах иргэдийн тоо нэмэгдэнэ. Эрт илрүүлгийн хамрагдалтыг энэ онд 80 хувьд хүргэж, ирэх жил үргэлжлүүлнэ. Энэ онд эрт илрүүлэгт 60 тэрбум төгрөг төсөвлөсөн" гэлээ.
