АНУ-ын Үндэсний аюулгүйн албаны төлөөлөгч Жон Кирби Америкийн тагнуулын мэдээлэлд үндэслэн сүүлийн таван сарын хугацаанд Украины дайны үеэр Оросын 20 мянга гаруй цэрэг амиа алдаж, 80 мянган хүн шархадсан гэж мэдээлжээ.
Тэдний ихэнх нь Бахмутад амь үрэгдсэн бөгөөд 2022 оны арванхоёрдугаар сараас хойш амиа алдагсдын тал нь “Вагнер” хувийн цэргийн компанийн хөлсний цэргүүд байсан гэв.
Түүнчлэн Кирби Донбасс дахь Оросын давших үйл ажиллагаа бүтэлгүйтсэн гэж Кирби дүгнэжээ.
Амь үрэгдэгсдийн тал нь "Вагнер" компаийн цэргүүд бөгөөд ихэнх нь Оросын хоригдлууд байсан аж. Тэд байлдааны туршлагагүй, бэлтгэлгүй, командлал, зохион байгуулалтын ямар ч мэдлэггүй байсан талаар Кирби хэлсэн байна.
Түүний зэрэгцээ Кирби Украины хохирлын талаар мэдээлэл өгөхөөс татгалзаж, "Украинчууд бол хохирогчид, харин Орос түрэмгийлэгч" гэжээ. Цагаан ордон Украин болон тус улсын армийн нөхцөл байдлыг хүндрүүлсэн мэдээлэл гаргахгүй гэж албаны хүн хэлсэн байна.
