Баасан гарагт ОХУ-ын засгийн газраас нэгэн тогтоолыг өөрсдийн веб сувгаар дамжуулан танилцуулжээ. Энэ талаар ТАСС мэдээллийн агентлаг бямба гарагт мэдээлсэн байна.
Тогтоолоос үзвэл, ОХУ 2024 оны дөрөвдүгээр сарын нэгний өдрийг хүртэл газрын тос, байгалийн хий, хийн конденсат олборлолтын албан ёсны статистик мэдээллийг олон нийтэд зарлахгүй гэжээ.
Тус улсын Статистикийн хорооны хувьд өнгөрөгч гуравдугаар сарын газрын тос, хийн конденсат олборлолтын тоон мэдээллийг танилцуулаагүй бөгөөд өдгөө улс орнууд 2023 оны эхний улирлын тайлангаа танилцуулж буй үед нэгдүгээр улирлын тайланг ч танилцуулаагүй билээ. Гэсэн хэдий ч тэд хийн олборлолтын статистик мэдээллийг танилцуулж байсан юм. Тэгвэл шийдвэрийн хүрээнд ОХУ-ын засгийн газар дээрх тоон мэдээллүүдийг 2024 оны хоёрдугаар улирлыг хүртэл танилцуулахгүй ажээ.
ТАСС мэдээллийн агентлагаас тогтоолыг олон нийтэд дамжуулахдаа ямар учраас ийн шийдэх болсныг тодруулаагүй юм. Гэвч тэдний дурдсанаар ОХУ-ын хийн олборлолт энэ оны эхний улиралд 14.1 хувиар буурсан гэжээ.
Эх сурвалж: ТАСС
