"Ард" кино театрын барилга нь 1960 аад оны дунд үеэс баригдаж 1965 онд ашиглалтад орж байсан. Харин "Ард" кино театр гэдэг нэр 1960 оноос ч өмнө байжээ. Ардчилал гарч, өмч хувьчлал эхэлснээр “Ард” кино театрыг МУГЖ Д.Сосорбарам худалдан авсан юм. Тэгвэл "Ард" кино театрын байрыг нурааж оронд нь дэлхийн жишигт нийцсэн бизнес төвийг барих болжээ. Иргэд түүхийн дурсгалт барилгыг нураахыг эсэргүүцэж байгаа учир Д.Сосорбарамаас тайлбар, мэдээллийг авлаа.
Тэрбээр: "Ард кино театр бол миний хувийн өмч. Би тухайн үеийн хууль журмын дагуу, өөрийнхөө мөнгөөр худалдан авсан. Худалдаж авсныхаа дараа "Бинго" сугалааг болиулж, сонгодог жүжиг туурвидаг байв. Ингээд үлдсэн зай талбайд нь байгууллагуудтай хамтын гэрээ хийж, түрээсэлдэг байсан.
Би өөрийнхөө хувийн өмчийг яаж ашиглах нь миний дур. Бид одоогийн байдлаар нь сэргээн засварлах гэж үзсэн. Гэвч "Ард" кино театрын барилгыг МХЕГ-аас насжилт нь дууссан, элэгдэл ихтэй барилга гэсэн учир сэргээн засварлах боломж байгаагүй. Энэ газарт хэдэн мундаг залуучууд нийлээд олон улсын бизнесийн төв нээх гэж байгаа. Дотроо олон улсын стандартад нийцсэн кино театртай мөн байнга сонгодог жүжиг тоглогдоно.
Хэдэн хүн нийлээд намайг айлгаж, зогсооно гэж бодож байвал үгүй. Би хийнэ гэснээ хийж, зорьсондоо хүрнэ" гэв.
