"Globsec" судалгааны төвөөс дайн дууссаны дараа Украинд тулгарч буй хэцүү, өртөг өндөртэй, бараг боломжгүй гэмээр зорилтуудыг тодорхойлсон тайланг нийтэлжээ. Өөрөөр хэлбэл тус улсын нутаг дэвсгэрийг минаас цэвэрлэх тухай өгүүлж буй хэрэг.
Украины эзлэгдсэн нутаг дэвсгэрийн бараг гуравны нэгийг Оросын армийн тэнд үлдээсэн сум болон бусад тэсэрч дэлбэрэх бодисыг сайтар шалгах шаардлагатай болно. Энэ нь ойролцоогоор 174,000 кв.км газар нутаг юм.
Баримт бичигт дурдсанаар өнөөдөр Украйн дэлхийн хамгийн том минажуулсан нутаг дэвсгэр болоод байгаа бөгөөд энэ үзүүлэлтээрээ Афганистан, Сирийг ч гүйцэж түрүүлээд байна.
Тулаан үргэлжилж, дайн дуусаагүй байгаа учир цэвэрлэх шаардлагатай ихэнх газар нутгийг тооцоолох бараг боломжгүй, түүнчлэн Украины газар нутгийн 18 орчим хувь нь Оросын зэвсэгт хүчний хяналтад хэвээр байна.
Оросууд ухрах үеэрээ "хавх" үлдээдэг гэдгээрээ алдартай. Тэдгээрийг замын хажууд, амьтад, амь үрэгдсэн цэргүүдийн цогцос дээр суурилуулдаг бөгөөд ингэснээр эдгээр цогцосыг шалгах эсвэл ойр орчмын бусад хөдөлгөөн нь тэнд байрлуулсан тэсрэх төхөөрөмжийг өдөөдөг.
Заримдаа тэсрэх төхөөрөмжийг хоёр, бүр гурваар нь цогц байдлаар байршуулдаг. Энэ тохиолдолд эхний дэлбэрэлт ихэвчлэн бага хүч чадалтай гол нь анхаарал татаж эргэн тойронд аль болох олон хүнийг цуглуулах зорилготой бөгөөд үүний дараа тэнд байгсад санамсаргүйгээр хоёр дахь тэсрэх төхөөрөмжийг ажиллуулдаг бөгөөд энэ нь хөнөөх хүч ихтэй байдаг.
Одоогийн байдлаар минээс цэвэрлэх ажил гамшгийн хэмжээнд удаан үргэлжилж байна гэж тайланд дурджээ. Украины Зэвсэгт хүчний хяналтад байдаг Донецк, Луганск мужуудын нутаг дэвсгэрт 2015-2021 онуудад минажуулсан байж болзошгүй газар нутгийн ердөө 6 орчим хувийг л цэвэрлээд байна.
Энэ нь ердөө 64 хавтгай дөрвөлжин километр газар нутаг гэсэн үг юм. Украины Батлан хамгаалах, дотоод хэргийн яамны нууц алба "HALO Trust" зэрэг олон улсын төрийн бус байгууллагуудын дэмжлэгтэйгээр энэ ажлыг гүйцэтгэдэг.
Хэрэв энэ янзаар цааш үргэлжилбэл Украины нутаг дэвсгэрийг мина-аас бүрэн цэвэрлэхэд 2700 гаруй жил шаардлагатай гэсэн үг юм.
Эх сурвалж: ВВС
