Украины дайн, Тайванийн асуудлаарх АНУ болон ОХУ, БНХАУ-ын хооронд хурцадмал байдал улам бүр даамжирч буйн улмаас өнгөрсөн онд дэлхийн цэргийн зардал өмнөх оныхоос 3,7 хувиар өсөн 2.24 их наяд ам.долларт хүрснээр түүхэн дээд амжилт тогтоожээ.
Тодруулбал Шведийн Олон улсын энх тайвны судалгааны хүрээлэнгийн (SIPRI) зүгээс орон нутгийн цагаар 24-ний өдөр дэлхийн цэргийн зардлын чиг хандлагын талаарх 2022 оны тайландаа ийнхүү мэдэгдсэн байна.
Дэлхийн улс орнуудын дунд өнгөрсөн онд цэргийн зардалдаа хамгийн их мөнгө зарцуулсан орноор АНУ тодорсон бөгөөд уг салбарт зарцуулсан мөнгөний хэмжээ 877 тэрбум ам.долларт хүрчээ. Харин БНХАУ 292 тэрбум ам.доллароор удаалсан бол ОХУ 86,4 тэрбум ам.доллароор гуравдугаарт оржээ. Ингэснээр эдгээр гурван улсын цэргийн зардал дэлхийн нийт цэргийн зардлын 56 хувийг эзэлж байгаа юм.
Өнгөрсөн онд дэлхийн улс орнуудын цэргийн зардал ийнхүү нэмэгдсэн хамгийн том шалтгаан бол Оросууд Украин руу довтолсон явдал юм.
ОХУ өнгөрсөн онд зэвсэгт хүчиндээ 86.4 тэрбум ам.доллар зарцуулсан нь өмнөх онтой харьцуулахад 9,2 хувиар өсч 2021 оны төсвийн төлөвлөгөөнөөс 34 хувиар давсан байна. Энэ нь Украиныг эзлэн түрэмгийлэхэд гарсан зардал анх төсөөлж байснаас хамаагүй нэмэгдсэн гэсэн үг юм.
Харин Украин улсын хувьд цэргийн зардалдаа 44 тэрбум ам.доллар зарцуулсан нь өмнөх онтой харьцуулахад 640 хувиар өссөн үзүүлэлт болжээ. Ингэснээр энэхүү статистик мэдээг гаргаж эхэлснээс хойш тус улсын жилийн хугацаан дахь цэргийн зардал хамгийн их хэмжээгээр өссөн үзүүлэлт болсныг Шведийн Олон улсын энх тайвны судалгааны хүрээлэн онцлон тэмдэглэв. Улмаар энэхүү жагсаалтад 2021 онд 44 тэрбум ам.доллароор 36 дугаарт бичигдэж байсан Украин улс өнгөрсөн жил 11 дүгээрт бичигджээ.
Европын орнууд нь зэвсэг, техникийн тал дээр Украиныг дэмжсэнээс гадна өөрсдийн батлан хамгаалах чадавхийг бэхжүүлснээр цэргийн зардал нь үлэмж нэмэгдсэн байна. Тодруулбал Европын цэргийн зардал мөн хугацаанд 13 хувиар нэмэгдэж, 480 тэрбум ам.долларт хүрчээ. Энэ нь хүйтэн дайнаас хойш цэргийн зардал хамгийн өндөр хувиар өссөн үзүүлэлт болсон юм. Тухайлбал Зүүн Европ дахь цэргийн зардал 58 хувиар өсч, 135 тэрбум ам.долларт хүрчээ. Төв болон Баруун Европын орнуудын цэргийн зардал 345 тэрбум ам.долларт хүрсэн нь өмнөх онтой харьцуулахад 3.6 хувиар өссөн үзүүлэлт болов.
Тус бүс нутагт цэргийн зардлаа хамгийн их хэмжээгээр өсгөсөн орон бол ОХУ-тай хил залгаа Финлянд улс юм. Энэ сарын эхээр НАТО-д элссэн тус улсын цэргийн зардал өмнөх оныхоос 36 хувиар өссөн байна. Литва (27%), Швед (12%), Польш (11%) зэрэг Оростой ойр байршдаг Европын орнууд цэргийн зардлаа үлэмж хэмжээгээр өсгөсөн байх юм.
Түүнчлэн Тайванийн асуудлаас болж хурцадмал байдал газар авч буй Ази, Далайн орнуудын цэргийн зардал нэмэгдсэн явдал нь ч дэлхийн цэргийн зардал нэмэгдэхэд нөлөөлөх гол хүчин зүйл болжээ. Өнгөрсөн онд Ази, Далайн орнуудын цэргийн зардал 575 тэрбум ам.долларт хүрснээр өмнөх оныхоос 2.7 хувиар өссөн байна.
Тухайлбал өнгөрсөн онд Хятадын цэргийн зардал 292 тэрбум ам.долларт хүрч өмнөх онтой харьцуулахад 4.2 хувиар, 2013 онтой харьцуулахад 63 хувиар тус тус өсчээ. Ингэснээр Хятадын цэргийн зардал 28 жил дараалан нэмэгдэж буй нь энэ аж.
Харин Японы өнгөрсөн оны цэргийн зардал өмнөх онтой харьцуулахад 5.9 хувиар нэмэгдэж, 46 тэрбум ам.долларт хүрсэн нь 1960 оноос хойших хамгийн өндөр өсөлт болов.
Нөгөөтэйгүүр Өмнөд Солонгосын мөн хугацаан дахь цэргийн зардал инфляцын өсөлтийн улмаас 2.5 хувиар буурсан байх юм.
Шведийн Олон улсын энх тайвны судалгааны хүрээлэнгийн ахлах судлаач Тиан Нан “Сүүлийн жилүүдэд дэлхийн цэргийн зардал тогтмол нэмэгдэж байгаагаас харахад бидний амьдарч буй нийгэм улам бүр тогтворгүй болж байгаагийн шинж гэж хэлж болох юм. Улс орнууд улам бүр тогтворгүй болж буй аюулгүй байдалтай холбоотойгоор цэргийн хүчин чадлаа бэхжүүлж байгаа бөгөөд энэ хандлага ойрын ирээдүйд ч өөрчлөгдөхгүй бололтой” хэмээн цохон тэмдэглэсэн байна.
Эх сурвалж: Kyunghyang
