“Их 7"-гийн бүлэг ОХУ-ын эсрэг нэмэлт хориг арга хэмжээ авах талаар хэлэлцэнэ гэх асуудал хөндөгдөж буй энэ үед Оросын тал “Хэрвээ уг асуудал бодитоор хэрэгжвэл дэлхийн эдийн засгийн хямрал улам бүр гүнзгийрэх болно” хэмээн эсэргүүцлээ илэрхийлсэн байна.
Гадаадын томоохон хэвлэл мэдээллийн хэрэгслүүдийн орон нутгийн цагаар 21-ний өдөр мэдээлснээр, Кремлийн ордны хэвлэлийн төлөөлөгч Дмитрий Песков мөн өдөр сэтгүүлчидтэй хийсэн бага хурлын үеэр “Их 7”-гийн бүлэг нэмэлт хориг арга хэмжээ авах гэж буйтай холбогдуулан түүний байр суурийг асуухад “Бид болж буй үйл явдлыг бүгдийг нь тун анхааралтай ажиглаж байна. АНУ болон Европын холбоо шинээр хориг арга хэмжээ авах талаар идэвхтэй хэлэлцэж байгаа нь тодорхой байна” хэмээн цохон тэмдэглэв.
Тодруулбал өмнөхөн нь Kyodo News агентлаг Японы засгийн газрын албан тушаалтнаас иш татан, “Их 7”-гийн бүлэг ОХУ-аас дэлхийн зах зээлд нийлүүлдэг бараг бүхий л бараа бүтээгдэхүүний экспортыг хориглох төлөвлөгөөг хэлэлцэж байгаа хэмээн мэдээлсэн юм.
Песков үргэлжлүүлэн “АНУ болон Европын холбооны зүгээс ОХУ-ын эсрэг авч хэрэгжүүлж буй хориг арга хэмжээ болон одоо хэлэлцэж байгаа нэмэлт хоригууд нь дэлхийн эдийн засагт сөргөөр нөлөөлнө гэж бид үзэж байна. Ингэснээр дэлхийн эдийн засгийн хямрал улам хурдацтай гүнзгийрэх нь тодорхой” хэмээн байр сууриа илэрхийлсэн байна.
"Дэлхийн аль ч улс одоогийнхтой адил хориг арга хэмжээнд өртөж байгаагүй гэдгийг бид мартах ёсгүй. Тиймээс бид дасан зохицож, хувьсан өөрчлөгдөж, урт хугацааны төлөвлөгөө гаргахын зэрэгцээ дайсныхаа санаа зорилгын цаад аюулыг бас бодолцох ёстой” хэмээн гэж тэрээр нэмж дурдав.
Эх сурвалж: Asiae
