Энэ онд Завхан аймгийн түүхт 100 жилийн ой тохионо. Ойг угтсан арга хэмжээнүүд цагаан сараас хойш болж байна. Тодруулбал, өнгөрсөн хоёрдугаар сард Улаанбаатар хотноо зохион байгуулагдсан “Завхан-100” хүндэтгэлийн тоглолт болсон. Харин түүхт ой долдугаар сарын сүүлчээр болох бөгөөд Завхан аймгийн түүхт 100 жилийн баяр наадмын ерөнхий найруулагчаар Төрийн соёрхолт, Урлагийн гавьяат зүтгэлтэн Н.Наранбаатар ажиллахаар сонгогджээ. Нэгэн зууны түүхийг бүтээсэн Завхан нутгийн ард иргэд наадамчин олны сонорыг мялааж, мэлмийг гийсэн сайхан тоглолтыг найруулна гэдэгт олон нийт итгэлтэй байна.
