"Гүрү дожо" клубийн 16 настай тамирчин Тэрбишийн Ариунзаяа 52 килограммын жинд Дарханы татамид дөрвөн барилдаан хийж залуучуудын улсын аваргад анх удаа түрүүллээ.
Энэ жингийн шилдгүүдийн нэг, 2022 оны өсвөр үеийн ДАШТ-ий хүрэл медальт, нэг клубийн эгч М.Нандин-Эрдэнэ ердөө хэдхэн хоногийн дараа Дохагийн ДАШТ-д томчуудтай анх удаа өрсөлдөх болсноор энэ жилийн залуучуудын улсын аваргыг өнжсөн. Тэгвэл хоёр жилийн өмнө 14 настайдаа залуучуудад үзүүрлэж байсан Т.Ариунзаяа охин энэ жил форм сайн буйгаа харуулж эгч нараа ээлж дараалан ялсаар 52 кг-ын жинд аваргаллаа.
Түүний хувьд энэ жилийн дөрөв дэх алтан медаль нь болсон бөгөөд хоёрдугаар сард Италийн Неаполь, Испанийн Фуэнхирола, Францын Тьонвиль хотод болсон Европын өсвөр үеийн цуврал тэмцээнд долоо долоо хоногийн зайтай дараалан түрүүлсэн юм. Дөрвөн алтаас гадна энэ сарын эхээр Казахстаны Алматыд болсон Азийн цомын тэмцээнээс мөнгөн медаль хүртсэн юм.
Эх сурвалж: MGL Sport
