УИХ-ын чуулганы нэгдсэн хуралдаанаар Эрдэнэс Тавантолгой ХК-д тогтоосон онцгой дэглэмийн хугацааг сунгах тухай УИХ-ын тогтоолын төслийг батлах асуудлыг хэлэлцэж байна.
М.Оюунчимэг, Дутсан нүүрсний асуудал олон хүний анхаарал татаж байна. Энэ том, жижиг Тавантолгойн алинд гарсан бэ. Нэг оптэйк гэрээний хугацаа дуусаагүй гэсэн. Энэ ямар учиртай гэрээ вэ, хэр алдагдалтай гэрээ вэ? Ийм байдлаар гэрээг хэрэгжүүлэх боломжтой юу? Иргэдэд хувьцааны ногдол ашиг 2021, 2022 онд өгөөгүй. Ногдол ашиг хуваарилах бололцоо байна уу?
Шадар сайд С.Амарсайхан, Засгийн газар онцгой дэглэм тогтоох үед ЭТТ ХК-д сахилга бат, санхүүгийн нөхцөл байдал муу байсан. БЭТ томилогдож нүүрс олборлолт, тээвэрлэлтийг нэмэгдүүлэх, шаардлагагүй орон тоог цомхотгох, зардлыг бууруулах, нүүрсийг ил тод худалдах Засгийн газрын бодлого хэрэгжүүлэх зорилгын хүрээнд ажилласан.
400 мянган тонн нүүрс борлуулж, 20.9 сая долларын нэмэлт орлого олсон. 2022 оны аравдугаар сард БЭТ томилогдсоноос хойш 258.9 мянган тонн нүүрсний төлбөр болох 13.9 сая долларын төлбөр барагдуулсан. 254.9 тэрбум төгрөгийн зардлын хэмнэлт хийсэн.
Бүрэн эрхт төлөөлөгч Ж.Ганбат, Дутсан нүүрстэй холбоотой асуудал 2012 оноос эхлэн 2017-2018 онд тодорхой хэмжээний төлбөр төлсөн. Алга болсон гэх 258.9 мянган тонн нүүрсний төлбөр болох 48 тэрбум төгрөгийг орон нутгийн Тавантолгой ХК-иас ЭТТ компанийн дансанд шилжүүлснээр энэ асуудал шийдэгдсэн.
Компани 2019 оны үйл ажиллагааны ашгийг 2020 онд нэг удаа хуваарилсан. Нэг иргэнд 96 мянган төгрөг хуваарилснаас хойш ногдол ашиг тараагаагүй байгаа.
Эрдэнэс Тавантолгой компани 2022 онд 1.3 их наяд төгрөгийн ашигтай ажилласан. Өнгөрсөн жилийн үйл ажиллагааны тайлан аудитаар шалгагдаж, 2023 оны дөрөвдүгээр сарын 28-нд хувьцаа эзэмшигчдийн хурлаар асуудлаа хэлэлцүүлнэ.
Компани 2024 оны долоодугаар сард нүүрс угаах, баяжуулах үйлдвэр байгуулахаар төлөвлөсөн учир энэ ажилд хөрөнгө оруулалт шаардлагатай байна гэв.
