УИХ-ын гишүүн, ХЗДХ-ийн сайд асан Ц.Нямдорж улс төрийн зүтгэлтэн С.Зориг агсны амь насыг хөнөөсөн гэх хэргээр шалгагдаж байсан Б.Содномдаржаа, Т.Чимгээ нарыг хэлмэгдүүлсэн хэмээн үздэг. Хэргийг нь хэрэгсэхгүй болгосон анхан шатны шүүхийн шийдвэр гарсантай холбогдуулан тэрээр байр сууриа илэрхийлсэн юм.
-Тэр хоёр хүнийг хэлмэгдүүлсэн. Би яриагүй бол энэ хоёр хүн шоронд үхэх байсан. Тэр үеийн Ерөнхийлөгч, УИХ, Засгийн газар, хууль хяналтын бүх дарга нартай тэмцэл хийсэн асуудал. Ийм нийгэмд хүнийг цусгүй хэлмэгдүүлнэ гэж байхгүй. Үндсэндээ дарангуйлал тогтсон байсныг би нураах гэж байдгаа тавьж тэмцсэн. Улаам цайм ямар ч гэмгүй хүмүүсийг захиалгаар хөнөөсөн гээд бариад хийчихсэн. Гурван шатны шүүх нь ийм л шийдвэр гаргасан. Тэр ажлыг зохион байгуулсан бүх хүнийг зайлуулж байж, мөс хөдөлсөн. Энэнээс улбаатай над руу дайраад байгаа. Би дарангуйлал, хүн хэлмэгдүүлэхийг үзэн яддаг хүн. Бүх хохирлыг нь төрөөр төлүүлэх ёстой. Дарангуйлал тогтохоос ер бусын тэмцэх ёстой. Шүүх яаж завхруулсныг одоо хар. Бүтэн зургаан жил энэ хүмүүсийг тамлалаа. Ганцхан өдөр шийдэх асуудлыг бүтэн 6 жил завхрууллаа.
-Та Мөнх-Эрдэнийн эсрэг гомдол гаргасан уу?
-Тэр Мөнх-Эрдэнэ гэдэг хүн чинь гурван нялх хүүхэдтэй хүн юм билээ. Би тэд нарыг нь бодоод гомдол гаргаагүй, хүүхэддээ ч битгий гомдол гаргаарай гэж хэлсэн. Намайг гомдол гаргасан, захиалга өгсөн гэж хардаж байгаа бол хуулийн байгууллагаар шалгуулж болно.
-Үндсэн хуулийн цэцийн шийдвэрийн талаар та ямар бодолтой байна вэ?
-Үндсэн хуулийн Цэц үргэлж, мөнхийн будлиан хутгадаг газар. Улстөрийн захиалга биелүүлдэг, Үндсэн хуульд ханддаг. Энэ цэцийн гэм биш зан боллоо. Тогтворгүй байдлыг үүсгээд байна шүү дээ.
-Авлига албан тушаалын гэх хэргүүд шил дараад илэрч байна. Таныг ХЗДХ-ийн сайдаар ажиллаж байх хугацаанд л гарсан зүйлс байна. Энэ тухайд та мэдэж байсан уу?
-Хуулийн байгууллагын хийж байгаа ажилд хөндлөнгөөс оролцож болохгүй алтан дүрэмтэй.Хэрэг мөрдөх ажил чинь нууцтай байдаг. Гэтэл сүүлийн үед юу ч эхлээгүй, юу ч болоогүй байхад гараад зарлачихдаг боллоо. Энэ чинь буруу шүү дээ. Баахан шар хэвлэл дээр захиалгатай юмнууд тавигддаг. Цөөхөн монголчууд дандаа ингэж хулгай ярьж амьдрах уу. Ердийн бизнесийг ч хулгай болгож ярьж байна. Би чинь улстөрд зоргоороо байсан хүн. Гэхдээ ганцхан үнэний төлөө явсан. Монголд ардчилал тогтоод нутагшаад өгөөсэй гэж... Одоо энэ АН-ыг хар. Ийм нам байдаг юм уу. Би зөндөө л хэлж байсан. АН-ын асуудал бол Монголын асуудал шүү гэдгийг саяхан ч хэлж л байсан.
