Сонгинохайрхан дүүргийн Засаг даргын тамгын газрын 2022 оны санхүүгийн тайланд аудитын шалгалт хийж нийт 14 зөрчил илрүүлжээ.
-Төсвийн хуулийг зөрчиж 1.7 сая төгрөгөөр хувийн машиндаа шатахуун хийжээ-
Сонгинохайрхан дүүргийн Засаг даргын орлогч Д.Ундармаа болон ЗДТГ-ын дарга Д.Төмөрбаатар нар Төсвийн тухай хуулийн 6-р зүйлийн 6.4.1 “төсвийг үр ашигтай, хэмнэлттэй байхаар төлөвлөж, зарцуулах” заалтыг зөрчиж хувийн машиндаа 1 сая 700 мянган төгрөгөөр шатахуун хийжээ. Мөн 1.1 сая төгрөгөөр шатахуун худалдан авсан гэж санхүүгийн тайланд мэдүүлсэн ч энэхүү гүйлгээг нотлох анхан шатны төлбөрийн баримт байгаагүй аж.
-Шилэн дансны хуулийг мөрдөж ажиллагаагүйгээс 1.4 тэрбум төгрөгийн зөрчил илрэв-
Сонгинохайрхан дүүргийн Засаг даргын тамгын газар 2022 онд 984 сая төгрөгийн орлоготой холбоотой 8 мэдээлэл, 330 сая төгрөгийн зарлагатай холбоотой 22 мэдээлэл, 117 сая төгрөгийн төсөв, өмч хөрөнгө, мөнгө зарцуулах шийдвэртэй холбоотой 18 мэдээллийг хугацаа хоцроож, Шилэн дансны цахим хуудсанд байршуулжээ. Төсвийн зарцуулалтыг ил болгож авлига, албан тушаалын хэргийг таслан зогсоох зорилгоор Шилэн дансны тухай хуулийг баталсан боловч хэрэгжилт нь СХД-т туйлын хангалтгүй байна. Төсвийн байгууллага нь шилэн дансны мэдээллээ ил тод байлгаж, тогтоосон хугацаанд шуурхай мэдээлэх үүргийг хуулиар хүлээдэг боловч СХД-ийн удирдлагууд 1.4 тэрбум төгрөгийн санхүүгийн гүйлгээтэй холбоотой мэдээллээ хугацаа хоцроож байршуулсан аж.
-Засгийн газрын 388 дугаар тогтоолыг зөрчиж гадаадад томилолтоор явж, бэлэг дурсгалын зүйл худалдан авчээ -
Парламентаас баталсан хууль, Засгийн газраас гаргасан тогтоолыг Сонгинохайрхан дүүргийн удирдлагууд мөрддөггүйг батлах өөр нэгэн баримт. Гадаад албан томилолтын зардлаа бүх шатны төсвийн байгууллага 100 хувь хэмнэх чиглэлийг Засгийн газраас өгч, тогтоол хүртэл баталсан ч 5 сая төгрөгийн зардал гарган гадаадад томилолтоор явж, 415 мянган төгрөгөөр бэлэг дурсгалын зүйл худалдан авчээ. Мөн бэлэг дурсгалын зүйл худалдаж авахыг Төрийн хэмнэлтийн тухай хуулиар хориглосон байхад бас л үл тоож 1.9 сая төгрөг зарцуулсан байна.
-50.7 сая төгрөгөөр сурагчдыг зусланд амрааж, төсөвт үрэлгэн ханджээ-
СХД-ийн Засаг дарга Н.Алтаншагай Монгол Улсын Төсвийн тухай хуулийг зөрчиж татвар төлөгчдийн мөнгөнд үрэлгэн ханджээ. Тодруулбал Засаг даргын санаачилгаар “Хөдөлмөрч хүүхдүүд” зусланд сургуулийн сурагчдыг амраах үйл ажиллагааг зохион байгуулж байр, хоолны зардал болох 50.7 сая төгрөгийг төсвөөс гаргуулжээ.
Эдгээрээс гадна Татварын цахим төлбөрийн баримтын системд 29.2 сая төгрөгийн худалдан авалтаа бүртгүүлээгүй. Хүүхдийн инээмсэглэл арга хэмжээ зохион байгуулж хөтлөгч, хамтлаг дуучин, тайзны төлбөрт 18.2 сая төгрөг зарцуулсан гээд Төсвийн тухай хууль, Төрийн хэмнэлтийн тухай хууль, Нягтлан бодох бүртгэлийн тухай хуультай холбоотой олон зөрчлийг гаргажээ. СХД бол бүх шатандаа МАН засаглаж буй дүүрэг. Энэ дүүргийн иргэдийг төлөөлж УИХ-д сонгогдсон гишүүд, нийслэл болон дүүргийн ИТХ-д сонгогдсон төлөөлөгчид бүгдээрээ МАН-ынх. Нэг намын хяналтгүй засаглал тогтохоор хууль гууль болж төсвийн мөнгөөр туйлж хувийн машиныхаа бензинийг хүртэл татвар төлөгчдөөр төлүүлдэг аж.
