Хятад улс АНУ-ын батлан хамгаалах салбарын тэргүүлэгч Lockheed Martin болон Raytheon компаниудад хориг арга хэмжээ авснаас гадна эдгээр компаниудын удирдлагуудад хориг арга хэмжээ авахаар болсноо мэдэгдэв.
Хятадын Худалдааны яам орон нутгийн цагаар 18-ны өдөр өөрийн цахим хуудсаараа дамжуулан мэдэгдсэнээр үндэсний бүрэн эрхэт, аюулгүй байдал, хөгжлийн ашиг сонирхлыг хамгаалах үүднээс Гадаад худалдааны хууль, Үндэсний аюулгүй байдлын тухай хуулийн дагуу АНУ-ын батлан хамгаалах салбарын Lockheed Martin болон Raytheon компаниудад 2023 оны 2 дугаар сарын 16-ны өдрөөс хориг арга хэмжээ авч эхлээд байсан бол энэ удаад тус 2 компанийн зургаан удирдах албан тушаалтныг хоригийн жагсаалтад оруулснаа онцлон тэмдэглэсэн байна.
Тэднийг БНХАУ-д нэвтрэхийг хориглож буйгаас гадна тус бизнес эрхлэх, түр болон урт хугацаагаар оршин суухыг хориглож байгаа гэж Худалдааны яамнаас тайлбарлав.
Түүнчлэн тус яамны хэвлэлийн төлөөлөгч "Нэр бүхий хоёр компани нь удаан хугацааны туршид Тайваньд зэвсэг зарж борлуулсаар ирсэн. Бидний зүгээс Хятадын аливаа бүтээгдэхүүнийг цэргийн үйлдвэрлэлд ашиглахаас сэргийлэх зорилгоор тус компаниудтай хийх импорт, экспортын үйл ажиллагааг мөн хориглоод байсан билээ” хэмээн мэдэгджээ.
Эх сурвалж: MBC
