Теsla компанийн гүйцэтгэх захирал Илон Маск OpenAI-ийн ChatGPT-тэй өрсөлдөхүйц шинэ хиймэл оюун ухаан хөгжүүлнэ гэдгээ зарласнаар энэхүү шинэ салбарын өрсөлдөөнд эргэлт буцалтгүй орж байгаагаа зарлав бололтой.
Тэрээр орон нутгийн цагаар 17-ны өдөр Fox News сувагт өгсөн ярилцлагадаа "Орчлон ертөнцийн мөн чанарыг ойлгохын тулд бид хамгийн дээд үнэнийг судлах "TruthGPT" нэртэй хиймэл оюун ухааныг хөгжүүлж эхлэх болно” хэмээн мэдэгджээ.
Тэрээр үргэлжлүүлэн “”TruthGPT” бол орчлон ертөнцийн утга учрыг ойлгож, танин мэдэх сонирхолтой хиймэл оюун ухаан болон хөгжих болно. Энэхүү хиймэл оюун ухаан нь хүн төрөлхтөнд аюул заналхийлэл учруулах магадлал хамгийн бага байна” хэмээн онцлон тэмдэглэв.
Түүнчлэн тэрээр “TruthGPT” гэх энэхүү хиймэл оюун ухааныхаа талаар ярихдаа “хүн төрөлхтөнд аюул занал учруулахгүй” гэж дурдсан явдал нь одоо үйл ажиллагаа явуулж буй хиймэл оюун ухаанд суурилсан үйлчилгээнүүдээс ялгаатай гэдгийг цохон тэмдэглэж буй хэрэг бололтой. Маск хиймэл оюун ухаан нь хүн төрөлхтөнд ноцтой аюул учруулж болзошгүй талаар хэд хэдэн удаа анхааруулсаар ирсэн. Тухайлбал дөнгөж өнгөрсөн сард тэрээр хамгийн сүүлийн үеийн хиймэл оюуны салбарын хөгжүүлэлтийг түр зогсоох хэрэгтэй хэмээн мэдэгдэж байсан билээ.
Тэрээр тус ярилцлагадаа мөн л хиймэл оюун ухааны хор хөнөөлийг дахин дурьдсан ба муухан хөгжүүлсэн хиймэл оюун ухаан бол үйл ажиллагааны хувьд доголдолтой нисэх онгоц, автомашинаас ч илүү аюултай хэмээн хэлжээ. "Хамгийн сүүлийн үеийн хиймэл оюун ухаан нь гайхалтай сайн бичиж, олон нийтийн санаа бодлыг ч удирдах боломжтой болсон. Бүр цаашлаад соёл иргэншлийг ч сүйрүүлэх эрсдэлтэй” хэмээн тэрээр өгүүлсэн байна.
Үүний зэрэгцээ OpenAI компанийн талаар ч тийм таатай үгсийг амнаасаа унагасангүй. Тодруулбал OpenAI болон Мicrosoft нар хамтран хиймэл оюун ухааныг хөгжүүлэх хамтын ажиллагааны гэрээ байгуулсан талаар тэрээр хэлэхдээ, "Google-тэй өрсөлдөнө гэх том зорилготойгоор Open AI компанийг үүсгэн байгуулахад маш их хүчин зүтгэлийг өөрөөсөө гаргаж байсан. Гэвч бизнесийн хамтралаас болж өнөөдрийг хүртэл хөгжүүлж ирсэн технологио нүд ирмэхийн зуур зүгээр л бүгдийг нь олонд дэлгэчихдэг юм байна” хэмээн тэрээр шүүмжлэнгүй хандав. Маск 2015 онд Сэм Алтман болон бусад хүмүүстэй хамтран Open AI компанийг үүсгэн байгуулж байсан ч хиймэл оюун ухааны судалгааны явцад ашиг сонирхлын зөрчил үүссэний улмаас захирлын суудлаа хүлээлгэн өгч, компани дахь өөрийн хувьцаагаа бүгдийг зарж байсан юм.
Маск "TruthGPT"-ийн хэтийн төлөв, хөгжлийн төлөвлөгөөний талаар тайлбар хийгээгүй байна. Гэсэн хэдий ч Wall Street Journal зэрэг гадаадын томоохон хэвлэл мэдээллийн хэрэгслүүдийн дурьдсанаар өнгөрөгч 16-ны өдөр түүний Невада мужид байгуулсан хиймэл оюун ухаан хөгжүүлэгч X.AI компанийг шинээр хөгжүүлэх гэж буй энэхүү хиймэл оюун ухаанд зориулан үүсгэн байгуулсан байж болзошгүй гэв.
Японы Nihon Keizai Shimbun сонины мэдээлснээр “TruthGPT” нь OpenAI компанийн хөгжүүлсэн хиймэл оюун ухаанд суурилсан “ChatGPT” үйлчилгээтэй харьцуулахад судалгааны зорилгоор бүтээгдсэн хиймэл оюун ухаан гэдгээрээ ялгарах болов уу хэмээн таамаглажээ.
Эх сурвалж: Asiae
