Монгол Улс 22 жилийн дараа анх удаа чөлөөт бөхөөрөө хүнд жингийн төрөлд Азийн аваргатай болсон билээ. Тодруулбал, Завхан аймгийн Яруу сумын харьяат, Улсын заан, МУГТ М.Лхагвагэрэл аварга болж Монгол Улсын төрийн дууллаа Казахстаны Астана хотод эгшиглүүлсэн билээ. Тэгвэл амжилт дүүрэн олз омог их, 9 медальтай чөлөөт бөхийн баг тамирчид дасгалжуулагчид өнөөдөр эх орондоо ирлээ.
Шинэхэн Азийн аварга М.Лхагвагэрэл хэвлэл мэдээллийн хэрэгсэлд ярилцлага өгчээ. Тэрбээр "Азийн аварга болсондоо маш их баяртай байна. Аварга болно гэдэгтээ итгэлтэй байсан. Сэтгэлзүйн хувьд ч сайн байсан. Зорилгынхоо араас бага багаар тэмүүлээд явж байна. Өрсөлдөгчийн хувьд барилдаж үзсэн тамирчинтайгаа финалд барилдсан. Бүгдийнх нь барилдааныг сайн мэднэ.
Багш маань сайн төвлөрч сатаарахгүй байхыг их сайн захисан. Би үндэсний бөхөөр барилддаг. Төрийнхөө баяр наадамд барилдана. Үндэс болон чөлөөт бөхөөрөө хамгийн дээд амжилтыг үзүүлэхийг зорьж байгаа" гэлээ.
