БНХАУ-ЫН ИРГЭН Э-Г АЛНА ГЭЖ ЗАНАЛХИЙЛСЭН ГОМДОЛ МЭДЭЭЛЛИЙГ ШАЛГАЖ БАЙНА
Эрүүгийн цагдаагийн албаны дарга, цагдаагийн хурандаа Т.Сүхболд цаг үеийн асуудлаар мэдээлэл хийлээ.
Тэрээр "Андын элч компанитай холбоотой дээрэм тонуул хийсэн, айлгаж сүрдүүлсэн этгээдүүдийг шалгасан.
- Сүхбаатар аймгийн нутаг дэвсгэрт байрлалтай "Андын элч" компанийн гаалийн талбайд гуравдугаар сарын 10-ны өдөр 20 орчим хүн бүлэглэн зэвсгийн чанартай эд зүйл ашиглан БНХАУ-ын иргэн Э-г ална гэж заналхийлсэн гомдол мэдээллийг шалгаж байна.
- Иргэн Ц-гийн гаргасан гомдолд тус компанийн гаалийн талбайд нүүрс тээврийн үйл ажиллагаа явуулдаг ажилчид жолооч руу хоёрдугаар сарын 10-14-ний өдрүүдэд 20 гаруй этгээдүүд дайрч заналхийлсэн гэх гомдол мэдээллүүд шалгагдаж байна.
- Мөн тус компанийн 49, 51 хувийн хувьцаа эзэмшигч нарын маргааны талаар гомдол мэдээлэл шалгагдаад гэмт хэргийн шинжгүй байна гэж үзсэн.
- "Андын элч" компанийн тамга, тэмдэг, гэрчилгээг зориуд хулгайлсан гэх хэрэг шалгагдаж байна.
- Түүнчлэн Андын элч компанитай нүүрс тээврийн болон гаалийн хяналтын талбайг ашиглан гэрээ байгуулсан ААН-үүдийн техник хэрэгсэл ашигласан гэх үйлдэлтэй холбоотой асуудлыг шалгаж байна.
- Мөн хувьцаа эзэмшигч иргэдийн хоорондын эд хөрөнгийн маргаан, компанийн эд зүйлийг хувьдаа завшсан гэх хэргийг шалгаж байна.
Өнөөдрийн байдлаар өмнө нь Сүхбаатар аймгийн Засаг дарга, ИТХ-ын төлөөлөгч, одоо сонгогдсон УИХ-ын гишүүд зэрэг албан тушаалтнуудыг уг хэрэгт холбогдуулан яллагдагчаар татан шалгаагүй" гэлээ.
ӨМНӨ НЬ ЯЛ ЭДЭЛЖ БАЙСАН ЭТГЭЭДҮҮДЭЭС БУСДЫГ ЗАНАЛХИЙЛЖ, ХАЛДДАГ ГЭМТ БҮЛЭГЛЭЛ ОДООГООР БАЙХГҮЙ
Тэрээр "Цагдаагийн байгууллагаас зохион байгуулалттай гэмт бүлэглэл үүсэж болзошгүй эрсдэлээс урьдчилан сэргийлэх, тэдгээрийн гэмт хэрэгт үйлдлийг таслан зогсоох, урьд өмнө нь удаа дараа ял шийтгүүлж байсан этгээдүүдэд тогтмол хяналт тавин ажилладаг.
Урьд өмнө нь удаа дараа ял шийтгүүлж байсан этгээдүүд Монгол Улсад үйл ажиллагаа явуулдаг гадаадын хөрөнгө оруулалттай компаниудын хөрөнгө оруулагч нартай харилцаа холбоо тогтоон, айлган сүрдүүлэх, гэмт хэрэг бүлэглэн үйлдсэн хэргүүдийг цагдаагийн байгууллага илрүүлэн шалгаж прокурор шүүхийн байгууллагад шилжүүлж, эрүүгийн хариуцлага тооцуулж байсан.
Мөн урьд өмнө нь удаа дараа ял шийтгүүлж байсан этгээдүүд зохион байгуулалттай бүлэг үүсгэж ААН, иргэдийн бизнесийн үйл ажиллагааг алдагдуулах, саад учруулах, ААН-ийн удирдлагуудын гэр бүл, ойр дотны иргэдийг шууд болон шууд бусаар айлган сүрдүүлэх, захиалагч талаас хувь авч, амьдралын эх үүсвэрээ шийдүүлж байсан этгээдүүдэд цагдаагийн байгууллагаа хяналт тавих, гэмт үйлдлээс урьдчилан сэргийлэх, таслан зогсоох, үйлдэгдсэн гэмт хэргийг илрүүлэх ажил тогтмол зохион байгуулсан.
Сүүлийн жилүүдийн тоон мэдээлэл:
- 2019 онд нийт таван бүлгийн зургаан этгээдийг
- 2020 онд таван бүлгийн 15 этгээдийг
- 2021 онд гурван бүлгийн зургаан этгээдийг
- 2020 онд зургаан бүлгийн 12 этгээдийг эрүүгийн хариуцлагад татаж, шүүхээс хорих ял шийтгэл оногдуулсан байна.
Найман бүлгийн 21 этгээдийн хууль бус үйлдлийг шалгаж, таван бүлгийн 13 этгээдийг эрүүгийн хэрэгт татан, мөрдөн шалгах ажиллагааг цагдаагийн байгууллагаас үргэлжлүүлэн явуулж байна. Өнөөдрийн байдлаар хорихоос суллагдсан, захиргааны хяналт тавьж байгаа иргэд байна. Тухайн иргэдэд цагдаагийн газар хэлтсүүд хяналт тавьж ажиллаж байна.
- Яллагдагчаар татсан, хэргийг нь шүүх прокурорт шилжүүлсэн 19 этгээд байна.
- Зорчих эрхийг хязгаарлах ял шийтгэл эдэлж байгаа гурван хүн байна.
- Мөн хориход ял эдэлж байгаа зургаан этгээд байна.
Хяналтад байгаа удаа дараа ял шийтгэгдсэн этгээдүүд дахин гэмт хэрэг үйлдэж, дахин ял шийтгэгдэх тохиолдлууд гарч байгаа. Гэхдээ амьдралаа зөвөөр авч яваа иргэд ч байна. Урьд өмнө нь удаа дараа ял шийтгүүлж байсан этгээдүүд дунд нийгэмд айдас түгшүүр төрүүлж, бусдыг заналхийлж, иргэдийн эрх чөлөө, эрүүл мэндэд халдан тогтвортой үйл ажиллагаа явуулж байгаа гэмт бүлэглэл одоогоор байхгүй.
