Засгийн газраас 2023 оны авлигатай тэмцэх жил болгож зарлаж, 5Ш ажиллагааг эхлүүлээд буй. Үүнтэй холбогдуулан "Шувуу" ажиллагааны хүрээнд ХХААХҮ-ийн сайд асан, УИХ-ын гишүүн асан Т.Бадамжунайг Филиппин улсаас авч ирсэн. Харин үүний дараагаар Эрүүгийн хуулийн 22.1 дэх зүйл ангид заасан гэмт хэрэгт холбогдоод буй Ж.Төгсбаяр Унгар улсаас, 22.5.1 дэх зүйл ангиар шалгагдаж буй П.Болортуяа БНСУ-аас өөрсдийн хүсэлтээр ирээд буй юм.
Тэгвэл тус ажиллагааны хүрээнд авилга, албан тушаалын хэрэгт яллагдагчаар татагдаад буй Хөгжлийн банкны төлөөлөн удирдах зөвлөлийн гишүүн асан Батсүрэнгийн Баттулга БНХАУ-д амьдарч байгаад Замын-Үүдийн боомтоор автомашинаар орж иржээ. Тэрбээр Хөх хот Эрээн гэсэн маршрутаар явж Монгол Улсын хилээр сая нэвтэрсэн аж.
