"Хөгжлийн банк"-ны гэх 80 хүн, 4 хуулийн этгээдэд холбогдох эрүүгийн хэргийн гэм буруугийн шүүх хуралдаан 2 дахь өдрөө үргэлжилж байна.
Хэргийн оролцогч талаас хэргийг тусгаарлах, гэрч оролцуулах, яллах дүгнэлтийг бүрэн эхээр нь уншуулах зэрэг санал хүсэлтүүд гаргалаа. Үүнтэй холбогдуулан шүүх бүрэлдэхүүн зөвлөхөөр завсарлалаа.
Шүүх хуралдаан үргэлжилж байна. Өмгөөлөгч нарын зүгээс асуудлыг хэлэлцэх дараалал, дэг, хуралдаанд оролцох байр суурьтай холбоотой асуудлаар саналаа хэлж байна. Харин прокурорын зүгээс Хөгжлийн Банкнаас 33 тэрбум төгрөгийн зээл авсан “Вертекс майнинг партнер” компанийн хэргээс эхлэх санал гаргажээ.
Шүүх хуралд УИХ-ын гишүүн Н.Алтанхуяг, Ё.Баатарбилэг нар яллагдагчаар татагдан оролцож буй. Тэгвэл УИХ-ын гишүүн Н.Алтанхуягийн өмгөөлөгчийн зүгээс шүүх хуралдааны түүнтэй холбогдох хэсгийг олон нийтэд нээлттэй явуулах хүсэлт гаргав.
Түүний өмгөөлөгч н.Болдбаатар "Тоон дотор үсэг яваад байгаа гэдэг шиг асуудал үүсээд байна. Тийм агуулгаар нээлттэй явуулах хүсэлт гаргасан. Хөгжлийн банкны гэх хэрэгт УИХ-ын гишүүн Н.Алтанхуяг ямар ч холбогдолгүй. Үүнийг шинжээчийн дүгнэлтээр баталсан. Харин Ерөнхий сайд хийж байхдаа Засгийн газраас гаргасан тогтоолуудтай холбогдуулан процесс зөрчсөн гэх үндэслэлээр холбож шалгаж байгаа. Үүнтэй холбогдуулан Эрүүгийн хэргийн тодорхой заалтуудыг үндэслэн Н.Алтанхуягт холбогдох хэргийг тусгаарлан шийдвэрлэж өгнө үү гэсэн хүсэлт гаргаж байна" гэлээ.
