Үндэсний цэцэрлэгт хүрээлэнд Таванбогд групп "KFC ланд" хотхон байгуулах зөвшөөрөл аван, ажлаа эхлүүлжээ. Гэвч олон нийт дургүйцэж, цемент цутгаж байснаас илүү зүлэг, модтой ногоон байгууламжаар нь байлгасан нь дээр гэх хандлагатай байсан. Учир нь Таванбогд группийн "KFC ланд" хотхонд KFC салбар байгуулагдах бөгөөд KFC түргэн хоолны логог маш томоор байршуулж, сурталчлах гэж байгаа явдалд олон нийтийн дургүйцлийг хүргээд байгаа юм. Тиймээс зарим хууль тогтоогчид ч Таванбогд групп давуу байдалтайгаар тэнд ашиг олох ёсгүй гэсэн байр суурьтай байгаа юм. Иргэдийн зүгээс "Үндэсний цэцэрлэгт хүрээлэн" ОНӨТҮГ-ын захирал Ү.Оюунзул, Таван Богд Группийн үүсгэн байгуулагч, Ерөнхийлөгч Ц.Баатарсайхан нарын энэхүү үйлдэлд Хотын дарга Д.Сумъяабазарыг цэг тавих болов уу гэсэн хүлээлттэй байсан ч ийнхүү ажил нь эхэлсэн бололтой.
Тухайлбал, УИХ-ын гишүүн Б.Энхбаяр:
"Үндэсний цэцэрлэгт хүрээлэн бол олон нийтийн, ашгийн төлөө бус, олон хоолны газрын аль нэгт давуу байдал олгодог газар биш. “Тохижуулах” халхавчаар бусдад давуу байдал олгох нь албан тушаалын гэмт хэрэг шүү. Таван богдын Ц.Баатарсайхан энийгээ боль! Өөр газар хоолоо зарах хэрэгтэй" гэсэн анхааруулга өгсөн.
Мөн УИХ-ын гишүүн, Байгаль орчны байнгын хороон дарга Б.Саранчимэг газар дээр нь ажиллаж, нийтийн ногоон байгууламж, цэцэрлэгт хүрээлэнг мөнгөтэй ганц компанид өгч, давуу эрхтэйгээр ашигийн төлөө үйл ажиллагаа явуулж болохгүй хэмээн онцолсон юм.
Гэвч ийнхүү Таванбогд групп газар ухаад, барилгжуулалтын ажлаа эхлүүлжээ. Уг нь Үндэсний цэцэрлэгт хүрээлэнг анх "New York"-ийн Central Park шиг хотын иргэд очиж амарч зугаалдаг, ногоон орчин болгоно гэж байгуулсан байдаг. Тус цэцэрлэгт хүрээлэн дотор Улаанбаатар хотын ундны усны худаг байрладаг бөгөөд тэнд 50см-ээс доош нүр ухах ч хориотой байдаг ажээ.
"KFC ланд" хотхоны зураг:
