Дэлхийн сонирхогчдын боксын ертөнц хоёр хуваагдаад байна. Олон улсын сонирхогчдын боксын холбооноос (IBA) боксын ДАШТ, тивийн аваргын тэмцээнүүдийг зохион байгуулж байгаа ч олимпын эрхийн тэмцээнийг ОУОХ удирдаж, хийнэ гэдгээ мэдэгдсэн. IBA холбооны тэргүүн, Оросын иргэн Умар Кремлев ОУОХ-той илт сөргөлдсөн байр суурьтай байгаа. Умар сонирхогчдын боксын ДАШТ-ий шагналын санг урьд өмнө байгаагүй өндөр болгож, нэмснээс гадна хөгжиж буй орнуудад боксыг хөгжүүлэхэд дэмжлэг үзүүлэх зэргээр олон төсөл хөтөлбөр хэрэгжүүлж эхлээд байна. Харин тус холбооноос зохион байгуулсан ДАШТ-д АНУ, Их Британи, Украин, Польш зэрэг улсын тамирчид оролцолгүй бойкот зарласан.
Inside the Games-д бичсэнээр АНУ, Их Британи болон тэдний холбоотон улсууд Олон улсын сонирхогчдын боксын холбооноос (IBA) гарч, World Boxing нэртэй шинэ холбоо байгуулахаар болжээ. Тус шинэ холбоо нь ОУОХ-той харилцан гэрээ байгуулснаар IBA холбоог сонирхогчдын боксоос шахан гаргах төлөвлөгөөтэй байгаа гэнэ. Олимпын эрхийг World Boxing холбоо олгоод эхэлбэл тамирчид ямар холбооны тэмцээнд оролцохоо сонгохоос өөр аргагүй болох юм.
