Японы Yomiuri Shimbun сонин болон NHK сувгийн мэдээлснээр "Их 7”-гийн бүлэг чухал ашигт малтмалын тогтвортой байдлыг хангахын тулд 1 их наяд иенийн хөрөнгө оруулалтыг уурхайн бүтээн байгуулалтад зориулахаар төлөвлөжээ.
Энэ сарын 15-аас 16-ны хооронд Японы Хоккайдо арлын Саппоро хотноо зохион байгуулагдах гэж буй “Их 7”-гийн Уур амьсгал, эрчим хүч, байгаль орчны сайд нарын уулзалтын үеэр гишүүн орнууд стратегийн ач холбогдол бүхий чухал ашигт малтмалын хувьд Хятадаас хараат байдлыг бууруулахын тулд уул уурхайн хамтарсан бүтээн байгуулалтад 1 их наяд гаруй иенийн санхүүгийн дэмжлэг үзүүлэх үйл ажиллагааны хөтөлбөр, төлөвлөгөөг боловсруулах аж.
Кобальт, лити, никель зэрэг чухал ашигт малтмалууд нь цахилгаан автомашины батарей болон хөдөлгүүр, хагас дамжуулагчийн гол материал болох зэргээр эрэлт нь нэмэгдэж байгаа тул Хятадтай ширүүхэн өрсөлдөөнийг эхлүүлж буй бололтой.
Түүнчлэн уг төлөвлөгөөг энэ удаагийн “Их 7”-гийн Уур амьсгал, эрчим хүч, байгаль орчны сайд нарын хамтарсан мэдэгдлээс тусад нь батлахаар төлөвлөж байгаа аж. Энэхүү асуудлыг энэ жилийн “Их 7”-гийн бүлгийг даргалж буй Япон улсын Эдийн засаг, худалдаа, аж үйлдвэрийн сайд Ясутоши Нишимура санал оруулсан байна.
Эх сурвалж: YTN
