2014 оноос хойш 26 мянга гаруй хүн Газар дундын тэнгисийг гаталж яваад амиа алдсан эсвэл сураггүй алга болсон байна. Энэ тухай пүрэв гарагт НҮБ-ын Хүний эрхийн дээд комиссарын газар мэдээллээ.
Тэдний 20,000 гаруй нь дэлхийн хамгийн их хүн амын шилжилт хөдөлгөөний замд тооцогддог Газар дундын тэнгисийн усан зам дагуу явж байхдаа амь насаа алдсан гэж тус комисс мэдээлэв.
НҮБ-ын Хүний эрхийн дээд комиссар Волкер Турк Пүрэв гарагт Газар дундын тэнгисийг гатлах гэж оролдсон цагаачид болон орогнол хүсэгчдэд тулгарч буй аюултай нөхцөл байдалд санаа зовниж байгаагаа илэрхийлж, тэднийг яаралтай аврах, аюулгүй байдлыг хангах, түүнчлэн хүндэтгэлтэй, үр ашигтай, хүртээмжтэй хандах үйл явцыг баталгаажуулахын тулд нэгдсэн арга хэмжээ авахыг уриалав.
Ф.Турк хэвлэлийнхэнд өгсөн мэдэгдэлдээ “Амь насаа эрсдэлд оруултлаа цөхрөнгөө барсан хүмүүсийн тоо эрс нэмэгдэж байгааг бид харж байна.
Тиймээс улс орнууд цагаачлалын илүү тогтмол сувгийг нээж, үүрэг хариуцлагын хуваарилалтыг чангатгаж, далайд аврагдсан бүх хүмүүсийг цаг тухайд нь эрэгт буулгах арга хэмжээ авч, цагаачлалын бодлого, үйл ажиллагаанд бие даасан хяналт тавихыг уриалав.
Дөрөвдүгээр сарын 8-нд Тунисын эргийн ойролцоо цагаачдын хоёр завь живсний улмаас дор хаяж дөрвөн хүн нас барж, 20 гаруй хүн сураггүй алга болсон талаар Хүний эрхийн дээд комиссарын газрын хамгийн сүүлийн мэдээнд дурджээ.
Итали улс 2023 он гараад 31.3 мянга орчим цагаач ирсэн гэж мэдээлсэн бол өнгөрсөн оны мөн үед энэ тоо 7.9 мянга орчим байжээ.
Цагаачлалын хямралтай тэмцэхийн тулд Италид дөрөвдүгээр сарын 11-нд онц байдал зарласан. Ф.Турк “Онц байдлын хүрээнд авч буй аливаа шинэ арга хэмжээ нь хүний эрхийн чиглэлээр хүлээсэн үүргээ Итали улс биелүүлэх ёстой” гэж онцолжээ.
"Хууль бус шилжилт хөдөлгөөнийг таслан зогсооход хатуу бодлого баримтлах нь гадагш гарахаас сэргийлж чадахгүй, харин илүү олон хүн далайд зовж шаналж, үхэлд хүрэх болно гэдгийг туршлагаас харж болно. Үүний оронд улс орнууд цагаачлалын аюулгүй, тогтмол маршрутаар хангаж, улмаар цагаачлалаас урьдчилан сэргийлэх нь хүний амь насыг үндэслэлгүйгээр үрэгдэхээс хамаагүй дээр байх болно" гэж тэр дүгнэв.
Эх сурвалж: Синьхуа
