УИХ-ын дарга асан З.Энхболдыг яллагдагчаар татаж, түүнд таслан сэргийлэх арга хэмжээ авах прокурорын саналаас шүүх өмнө нь татгалзсан байдаг.
Тодруулбал, шүүхээс "прокурор З.Энхболдод эрүүгийн хэрэг үүсгэж, яллагдагчаар татсан тогтоолоо танилцуулаагүй, тайлбар, мэдүүлэг аваагүй байхдаа таслан сэргийлэх арга хэмжээ авах тухай санал шүүхэд ирүүлсэн" гэх үндэслэлээр түүнд хязгаарлалт тогтоохоос татгалзсан. Улмаар "прокурор Эрүүгийн хэрэг хянан шийдвэрлэх тухай хуульд нийцүүлэн санал дахин гаргах эрх нь нээлттэй болно" гэдгийг тодотгосон юм. Тэгвэл Нийслэлийн прокурорын газраас Эрүүгийн хуулийн ерөнхий ангийн 3.1 дүгээр зүйлийн 1, 3 дахь хэсэг, 3.4 дүгээр зүйлийн 1 дэх хэсэгт заасныг тус тус журамлан мөн хуулийн тусгай ангийн 22.1 дүгээр зүйлийн 3 дахь хэсэгт зааснаар эрүүгийн хэрэг үүсгэж яллагдагчаар татсан З.Энхболдод “Монгол Улсын хилээр гарахыг хязгаарлах хязгаарлалт тогтоох таслан сэргийлэх арга хэмжээ авахуулах тухай” саналыг дахин шүүхэд хүргүүлжээ.
Уг прокурорын саналыг Сүхбаатар дүүргийн Эрүүгийн хэргийн анхан шатны шүүх хэлэлцээд яллагдагч З.Энхболдод Монгол Улсын хилээр гарахыг хязгаарлах, хязгаарлалт тогтоох таслан сэргийлэх арга хэмжээ авчээ. Тэрбээр албан тушаалын байдлаа урвуулан ашиглаж, бусдад давуу байдал олгосон гэх хэрэгт буруутгагдан шалгагдаж байгаа юм.
