Нийслэлийн Баянзүрх дүүргийн 21 дүгээр хорооны нутаг дэвсгэр, Дарь-Эхийн эцсийн буудлын ойролцоо 50 ортой эмнэлэг ашиглалтад ороод гурван жил болж болно. Хөдөөнөөс шилжин ирэгсэд олонтой хороо учраас хүн ам нь эмнэлгийн тусламж үйлчилгээг цаг алдалгүй авч чадахгүй байгаа учраас Дарь-Эхийн эцэст 5 тэрбум төгрөгөөр эмнэлэг барих ажлыг тухайн үед гишүүн байсан Д.Оюунхорол санаачилж, бусад хүмүүс байгууллагын дэмжлэгтэйгээр шуурхай баригдаж байсан. Тухайн үед шавь тавих ёслолд УИХ-ын гишүүн байсан Д.Оюунхорол, НЭМГ-ын дарга байсан Л.Төмөрбаатар, Баянзүрх дүүргийн МАН-ын дарга Э.Бат-Амгалан /одоо УИХ-ын гишүүн/, тус дүүргийн Эрүүл мэндийн төвийн дарга Ж.Энхзул, Ачитсайхан өрхийн эмнэлэгийн эмч Т.Аварга нар оролцож байсан.
Тодруулбал, тус эмнэлэг нь хоёрдугаар шатлалын эмчилгээ үйлчилгээг иргэдэд хүргэх бөгөөд БЗД-ийн хамгийн их хүн амтай 2, 21, 27 дугаар хорооны 50 мянга гаруй иргэнд эрүүл мэндийн тусламж үйлчилгээг чанартай хүртээмжтэй шуурхай хүргэхэд чухал нөлөө үзүүлэхээр баригдсан. Эмнэлэг нь дотор, мэс засал, хүүхэд, ахмадын хэвтэн эмчлүүлэх 50 ортой. Гэтэл өвлийн улиралд асуудалтай шугам хоолой ус нь хөлддөг учраас хүн хэвтэн эмчлүүлэх боломжгүй, зөвхөн амбулторийн байдлаар эмнэлэг ашиглагдаж байгаа гэнэ.
Мөн тухайн эмнэлгийн даргыг ХСҮТ-ийн дарга байсан одоо УИХ-ын гишүүн Ж.Чинбүрэн эмнэлгээсээ томилсон гэх мэдээлэл байгаа юм. Түүнчлэн энэ Дарь-Эх нэгдсэн эмнэлгийг цаашид ХӨНГӨВЧЛӨХ эмнэлэг болгоно гэсэн албан бус мэдээлэл ч байна.
Түүнээс гадна Ачитсайхан өрхийн эмнэлэг зураг төслийг нь гаргуулсан төдийгүй, эмнэлгийн нэг давхрыг бүхэлд нь Ачитсайхан эмнэлгийн мэдэлд өгнө гэж анх гэрээ байгуулахдаа хэлэлцэж ярилцсан байдаг. Гэвч өнөөдрийн байдлаар ганц агуулах өгснөөс өөр зүйл өгөөгүй гэдгийг өрхийн эмнэлгийн эмч нар хэлж байна. Өрхийн эмнэлгийн ачаалал их байдаг учраас эмнэлгээ томсгож, шинэ эмнэлгийн нэг давхарт төвхнөх гэхээр оруулахгүй байгаа ажээ.
