УИХ дахь МАН-ын бүлэг ээлжит хурлаараа Монгол Улсын эдийн засгийн нөхцөл байдлын талаар Эдийн засаг, хөгжлийн сайд Ч.Хүрэлбаатарын мэдээллийг сонсжээ. Энэ талаар тус бүлгийн дэд дарга М.Оюунчимэг, Ч.Хүрэлбаатар сайд нар мэдээлэл хийлээ.
М.Оюунчимэг: -Эдийн засгийг нэмэгдүүлэх, хөдөө аж ахуйг дэмжих, тариаланчдад олгох зээл тусламжийг нэмэх талаар арга хэмжээнүүдийг авч хэрэгжүүлдэг ч эцсийн бүтээгдэхүүн хэрэглэгчдийн гар дээр ирэхэд өндөр үнэтэй байдаг. Эдгээр асуудлыг бүлгийн хурлаар хэлэлцсэн. Гишүүдийн зүгээс цар тахлын нөхцөл байдлаас хойш эдийн засаг харьцангуй сайжирч байгаа учир иргэдийн өрхийн орлогыг нэмэгдүүлэхэд онцгой анхаарах хэрэгтэй гэдэгт байр сууриа илэрхийлсэн.
Ч.Хүрэлбаатар: -2022 онд Монгол Улсын эдийн засаг 4.8 хувиар өслөө. Цар тахлын хугацаанд өсөлт бага буюу хасах байсан. Энэ бүгдээс авч үзвэл цар тахлаас өмнөх буюу 2019 оноос өмнөх үетэй харьцуулахад 1.7 хувь өссөн байна. Цаашид улсын эдийн засгийг өсгөх бодлогын арга хэмжээг авч хэрэгжүүлэх зайлшгүй шаардлагатай байгаа. Саяхан Олон улсын валютын сангаас дэлхийн улс орнуудын эдийн засгийн нөхцөл байдлыг харьцуулан гаргасан. 2023-2024 онд дэлхий эдийн засгийн өсөлт бага байх хэдий ч Хятадын хувьд эдийн засгаа таван хувиар өсгөх зорилт тавьсан. Он гарснаас хойш эхний гурван сарын хугацаанд урд хөршийн эдийн засгийн өсөлт сайн үзүүлэлттэй байгаа нь Монгол Улсын эдийн засаг 2023 онд дор хаяж зургаан хувиар өснө гэсэн төсөөлөлтэй байна. Өнгөрсөн онд өрхийн орлого 0.7, малчдын орлого 17 хувиар буурсан. Тиймээс Засгийн газраас малчдыг дэмжих бодлого хэрэгжүүлж байгаа. Одоогоор эцсийн дүн хараахан гараагүй ч ноолуур, махны экспорт өссөн.
Хөрөнгө оруулалтын тухай хуулийг ойрын хугацаанд батлах шаардлагатай талаар олон гишүүд санал хэллээ. Тус хуульд өөрчлөлт оруулахтай холбоотой иргэдийн саналыг энэ долоо хоногт авч эхэлнэ. Дэлхий даяар бодлогын хүүг нэмэгдүүлсэн учир энэ цаг үед бид хөрөнгө оруулалтыг татах нь маш чухал.
Уул уурхай, тээвэр, барилгын салбараас бусад бүх салбар ковидын өмнөх үеийн орлогодоо хүрсэн. Тиймээс энэ гурван салбарт онцгой анхаарах шаардлага үүсэж байна.
