Үндэсний аудитын газраас "Цемент шохой" ТӨХК-ийн 2022 оны жилийн эцсийн байдлаарх санхүүгийн байдал, өмчийн өөрчлөлт, мөнгөн гүйлгээний тайланд аудит хийсэн. Тодруулбал, төрд бүрэн шилжсэний дараах санхүүгийн балансыг шалгахад 2022 оны дөрөвдүгээр сарын 1-нээс 2022 оны арванхоёрдугаар сарын 31-ний өдөр хүртэлх санхүүгийн тайлангаас 462 тэрбум 551 сая төгрөгийн зөрчил илэрчээ.
Мөн Гүйцэтгэх захирлын хувийн зардалд 6 сая төгрөг, Улаанбаатар дахь оффисын үйл ажиллгаанд батлагдсан төлөвлөгөөнд тусгаагүй 26 сая 900 мянга, Баримтаар нотлогдоогүй ажилчдын хор саармагжуулах гэсэн гүйлгээний 11 сая төгрөг зэрэг нийт 58 сая төгрөгийн үргүй зардлыг гаргасан нь илэрсэн байна. Түүнчлэн 35 сая төгрөгийн авлага барагдуулахын тулд 37 сая 800 мянган төгрөгийн хуулийн зөвлөх гэрээ байгуулсан гэж аудит гаргасан зөрчил нь нийгэмд нэлээд дуулиан тариад байгаа юм. Тэгвэл эдгээр мэдээлэлд тус компанийн гүйцэтгэх захирал Л.Наранбаатар өнөөдөр мэдээдлэл хийхээр болжээ.
Тэрбээр гүтгэлэгийн шинж чанартай мэдээлэлд тайлбар өгнө гэв. Тодруулбал " 35,000,000₮ авлага барагдуулахын тулд 37,800,000₮ хуулийн зөвлөх гэрээ байгуулсан гэж аудит хийсэн “Ди Эй Би Жи Аудит” компани гүтгэжээ. Аудитын компани тэр гэрээг 24 цагийн дотор гаргаж олон нийтэд үзүүлэхийг шаардаж байна. Хэрэв гаргаж ирж үзүүлж чадахгүй бол та бүхэн надаас болон Цемент Шохой ТӨКХ-ийн хамт олноос уучлалт гуйх нь зүйд нийцнэ. Хэрвээ уучлалт гуйхгүй бол хуулийн байгууллагад хандана" гэж мэдэгджээ.
