Засгийн газраас 5Ш буюу Шувуу ажиллагааг хэрэгжүүлж, гадаад улс руу оргон зайлсан авлига албан тушаалын хэрэгт холбогдсон 90 гаруй хүнийг авчрахаар нэрсийг нь зарласан. Эхний ээлжинд АТГ-ын мөрдөгчид нэр бүхий 20 хүнийг авчрахаар ажиллаж байна гэсэн мэдээллийг өчигдөр өглөө. Шувуу ажиллагааны хамгийн эхний хүнээр сайд асан Т.Бадамжунайг "шүүрэв". Харин түүний араас Хөдөлмөрийн баатар Н.Удаанжаргал, Ерөнхий сайд Ч.Сайханбилэг тэргүүтэй хүмүүсийг эх оронд нь авчирч мөрдөн шалгах ажиллагааг үргэлжлүүлнэ.
Тэгвэл нэр бүхий хүмүүс дотроос анхаарал татаж байгаа нэг хүн байна. Тодруулбал, АТГ өнгөрсөн 2019 онд Салхитын мөнгөний орд газрыг эзэмшигч нартай холбоотой хэргийг шалгах шатанд Нийслэлийн Захиргааны хэргийн анхан шатны шүүхийн шүүгч асан С.Төмөрбат холбоотой болохыг олж тогтоосон. Тэрбээр энэ авлигын хэрэгт холбогдож, шүүгчийнх нь бүрэн эрхийг түдгэлзүүлэнгүүт тухайн оныхоо зургадугаар сард гэр бүлийнхээ хамтаар Сэлэнгэ аймгийн Алтанбулаг боомтоор гарч, ОХУ-аар дамжин, АНУ-д очсоноос хойш эх орондоо эргэж ирээгүй юм. Ийнхүү түүний холбогдсон хэргийг хамсаатангуудаас салган авч, түр түдгэлзүүлсэн байдалтай байгаа. Учир нь эзэн холбогдогч нь байхгүй оргон зайлсан гэсэн үг.
Хэргийг эргэн сануулахад, энэхүү Салхитын мөнгөний ордын хэрэгт холбоотойгоор анх АТГ -аас С.Төмөрбат шүүгчийн ээж Монгол Улсын гавьяат хуульч агсан Л.Бямбааг саатуулан шалгаж эхэлсэн. Түүнийг 2019 оны гуравдугаар сард ШШГЕГ-ын харьяа хорих 461 дүгээр ангид саатуулсан ч тэрээр гэрээсэл бичиж үлдээгээд амиа хорлосон байдаг.
АТГ-ын хувьд 2019 оноос хойш С.Төмөрбатыг буцаан авч ирэх асуудлаар ажиллаж байгаа ч өнөөдрийг хүртэл авч ирж чадаагүй. Чадаагүй шалтгааныг С.Төмөрбат нь АНУ-аас улс төрийн орогнол, эсвэл тус улсад цагаачлах хүсэлт гаргасан байх магадлалтай. Энэ тохиолдолд тухайн улсын хуулийн дагуу хүсэлт гаргагчийн талаар ямар нэгэн мэдээллийг задруулдаггүй. Мөн Монгол Улс, АНУ хооронд ялтан солилцох гэрээ байдаггүй тул эх оронд нь авч ирэх бололцоогүй тухай асуудал ч хөндөгдөж байна гэдгийг хэлсэн.
Тэгвэл Засгийн газраас хэрэгжүүлж байгаа Шувуу ажиллагааны хүрээнд С.Төмөрбатыг авч ирэх боломжтой болжээ. Тэрбээр цагаачлах хүсэлт гаргаснаас АНУ-гийн тал хүсэлтийг хүлээж аваагүй. Түр хугацаагаар буюу орогнол байдлаар тэнд амьдарч байгаа юм байна.
