Иргэн Д.Мөнх-Эрдэнийн шүүх хуралд ажиглагчаар суусан АН-ын хууль эрхзүйн асуудал хариуцсан дэд дарга Д.Ганбаяр:
Шүүхийн хурлын үйл ажиллагаанд ажиглагчаар оролцож байна. Энэ бол улстөрийн хилс хэрэг тохох гэсэн зохион байгуулалттай шүүх ажиллагаа байна. Мөнх-Эрдэнийг 2020 онд энэ буруутгаад байгаа хэргээр нь шалгаж болох байтал сонгууль дөхүүлж албаар улстөрийн хоригдол болгож, өөрсдийнхөө буруутай үйлдлийг хаах зорилгоор ял оноож байгаа процесс байна гэж олж харлаа.
Д.Мөнх-Эрдэнэ сая шүүгчээр татгалзах хүсэлт гаргасан. Отгонцэцэг гээд байгаа шүүгч нь Архангай аймгийн шүүгч юм байна.Шүүх хурал нээлттэй болсон учраас би хэлж байна. 2023 оны нэгдүгээр сарын 20-ны өдөр Ганхөлөг гээд прокурор нь Мөнх-Эрдэнийг өрөөндөө дуудаад “ Ахаа танд дээрээс ял өг гээд байна. Тийм учраас таныг явуулахгүй бол болохгүй нь гэж хэлсэн” гэдгийг шүүх протколд орууллаа. Яг үнэндээ Үндсэн хуулиар олгогдсон үг хэлэх эрхийг нь хаах гэсэндээ барьж хорьсон гэдэг нь тодорхой байна. Шүүгчид нь Мөнх-Эрдэнэд ял тохоод явуулбал Улаанбаатарт шүүгчээр үлдээнэ гэж хэлсэн байна. Мөнх-Эрдэнэ шүүгч, прокуророос татгалзсан учраас 14 хоног завсарлага авах ёстой байтал ганцхан цагийн завсарлага өглөө. Шүүх засаглал нурж байна. Мөн түүнд өмгөөлөх эрхийг хангах боломж олгохгүй байна” гэсэн мэдээлэл өглөө.
