УИХ-ын чуулганы нэгдсэн хуралдаан үргэлжилж байна. Хууль тогтоомжийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүд /Засгийн газар 2023.01.18-ны өдөр өргөн мэдүүлсэн, хэлэлцэх эсэх/ тухай асуудалд ХЗДХ-ийн сайд Х.Нямбаатар сайд Г.Тэмүүлэн гишүүнд хандаж тайлбар хийв.
Монгол Улсын Их Хурлын гишүүн, Төсвийн байнгын хорооны дарга Г.Тэмүүлэн: Төсвийн тогтвортой байдлын тухай хууль дээр тусгасан байсан төсвийн тусгай шаардлага буюу төсвийг хариуцлагатай байлгах үүднээс шаардлагуудыг зааж өгсөн. ДНБ, төсвийн алдагдлын хувь, засгийн газрын өр зээлийн хэмжээ хэдэн хувь байгааг зааж өгдөг. Тэгтэл түр түдгэлзүүлэх гэсэн заалттай байсан асуудлыг зогсоох гэж орж ирж байна. Түдгэлзүүлэх, зогсоох гэсэн хоёр асуудал орж ирсэн байна. Энэ бол утга агуулгын хувьд хоёр өөр зүйл шүү. Бид нар зөвхөн засгийн газар онцгой нөхцөл байдал үүсэж, эдийн засгийн нөхцөл байдал хүндрэхээр түр хугацаанд түдгэлзүүлдэг байсан зүйлийг зогсооно гэхээр агуулгын хувьд ч буруу ойлголтыг авч ирж байна. Тэгэхээр та энэ түдгэлзүүлэх гэх үгээр битгий оролд Х.Нямбаатар сайдаа та түдгэлзүүлэх гэдэг үгээр битгий оролд. Би энэ хуульд өөрчлөлт оруулахыг дэмжихгүй.
Улсын Их Хурлын гишүүн, Засгийн газрын гишүүн, Хууль зүй, дотоод хэргийн сайд Х.Нямбаатар: “Төсвийн байнгын хорооны дарга олон нийтэд таалагдах гээд амьдрал дээр зөрчигдөж байгаа зөрчлийг нь гаргаж өгье гэхээр гаргаад хэрэггүй гээд байх юм. Төсвийн тодотгол хийхэд хууль тогтоомжийн хуулийг барьж хэзээ ч хийдэггүй. Төсвийн тодотгол цаг хугацаатай орж ирдэг. Тэгээд УИХ хэлэлцээд явдаг. Гэтэл амьдралд хуулийн зөрчил гарч, зөрчилдөөд байна аа гэхээр төсөвтэй холбоотой асуудлаа төсвийн тогтвортой байдлын хуулиараа зохицуулж яв. Тэгэхгүй бол хууль тогтоомжийн хуультай зөрчилдаад байна. Г.Тэмүүлэн гишүүнд юм хэлэхэд УИХ-аас гарах хууль тогтоол шийдвэрийн төслийн тухай хууль гэж анх 2000-аад оны дунд үеэр явж байсан. Төсвийн тодотголтой холбоотой асуудлууд хууль тогтоомжийн хуулиар зохицуулагдаж болохгүй байна.
Сүүлд 2016 оноос эхлээд хууль тогтоомжийн тухай хууль гэж оруулж ирж, хуулийн төслийг яаж санаачилж, яаж шаардлага хангаж байж УИХ-д өргөн мэдүүлэх вэ гэдэг харилцааг оруулж ирсэн. Г.Тэмүүлэн гишүүн чи надад дургүй байж болно. Чи энэ хууль тогтоомжийн хуулийг гацаах гэж хоёр удаа явж байгаа шүү. Цаана чинь АНУ-тай ил тод байдлыг хэлэлцээр зөрчигдөөд янз бүрийн асуудал үүсээд байгаа учраас хууль тогтоомжийн хуулийг оруулж ирж байгаа”гэв.
