Төрийн байгуулалтын байнгын хорооны даргын томилгооны асуудлыг чуулганы нэгдсэн хуралдаанаар хэлэлцэж байх үед УИХ-ын гишүүн Т.Доржханд “Зөв хүн электорат эвсэл"-ээс тус байнгын хороонд төлөөлөл оруулах хүсэлтэй байгаагаа илэрхийллээ.
Тэрбээр “Нэр дэвшигчийг дэмжиж байгаа. Хаврын чуулган засаглалын асуудлыг шийдвэрлэх, магадгүй 30 жилийн алдааг нэг бүр өөрчлөх, өөрчлөлтийн асуудлыг хэлэлцэнэ.Улс төрийн намын тухай хууль, Сонгуулийн тухай хууль гээд томоохон зарчмын өөрчлөлтийн хуулиудыг хэлэлцэнэ. Ийм цаг үед байнгын хороон дээр ийм туршлагатай парламентч томилогдож байгаад баяртай байна.
Харин санал оруулж ирсэн Монгол Ардын намын намын бүлгийн даргаас асуулт байна. Монгол Улсын өнөөгийн их хуралд гурван нам үйл ажиллагаа явуулж байгаа. Үндсэндээ хоёр нам, нэг эвсэл... МАН, АН+ Зөв хүн электорат эвсэл гээд төлөөлөл бол албан ёсоор үйл ажиллагаа явуулж байгаа.
Эвслийн зүгээс энэ парламентад оруулж байгаа үүрэг, хувь нэмэр нэлээн өндөр байгаа гэж бид үздэг. Монгол Улс парламентын засаглалтай улс. Энэ агуулгаараа бид парламентын ардчиллыг бэхжүүлэх, тогтолцооны өөрчлөлтийг хийх, парламентын нэр хүндийг бий болгох, засаглалын оновчтой бүтцийг бий болгох чиглэлээр сүүлийн хоёр жил маш идэвхтэй ажиллаж байгаа.
Үүнтэй холбоотой ТББ-ын хороо эдгээр асуудлуудыг хэлэлцдэг, чуулганд оруулдаг онцлог бүхий байнгын хороо юм. Гэтэл энэ байнгын хороонд Ардын намын төлөөллүүд давамгайлж байна. Ардчилсан намын төлөөлөл бол байна. Харин парламентад суудалтай 3 дахь намын төлөөлөл орох зайлшгүй шаардлага байгаа. Ялангуяа энэ сонгуулийн тогтолцооны асуудал ярих үед, Улс төрийн намын тухай хууль ярих үед, шаардлагатай бол Үндсэн хуулийн нэмэлт, өөрчлөлтийн асуудал ярих үед... энэ нь зөвшилцөл дээр явагдах ёстой хуулийн төслүүд юм.
Тиймээс ХҮН-ын даргын хувьд, УИХ-ын гишүүний хувьд бид УИХ-ын даргад нэлээн хэдэн удаа хүсэлтээ өгсөн байгаа. Өмнөх байнгын хорооны даргад энэ байнгын хороонд орж ажиллах хүсэлтээ өгсөн. Тэгээд орон тоо гарсан тохиолдолд ХҮН –ын төлөөллийг, таныг оруулах болно гэдгээ хэлсэн.
Мөн УИХ-ын бүлгийн даргатай уулзсан. Бүлгийн дарга тийм байр суурьтай байсан. Одоо нэг орон тоо гарч байна. Тэгэхлээр энэ УИХ-д байгаа намуудын төлөөллийг хангах, тэнцвэртэй байдлыг хангах, оролцоог нь хангах шаардлага байгаа. Тийм болохоор ТББ-ын хороонд ажиллах манай "ХҮН-Зөв хүн электорат эвсэл"-ийн хүсэлтийг шийдвэрлэж өгөх талаар та нар яаралтай арга хэмжээ авч өгөөчээ гэж хүсэж байна" гэв.
Б.Ирээдүй
