Сагсан бөмбөгийн Үндэсний дээд лигийн хасагдах шатны тоглолтууд гал гарсан өрсөлдөөн дунд үргэлжилж байна.
Өнгөрсөн улирлын шигшээ цувралын өрсөлдөгчид энэ жил хагас шигшээд хоорондоо учраа таарч гуравдахь тоглолтоо хийлээ. Грек дасгалжуулагчаар удирдуулсан Уурхайчид улирлыг зөвхөн нэг ялагдалтайгаар амжилттай дуусгасан бол плэйоффт нэг ч ялагдалгүй (7-0) өнгөлж явна. Өчигдөр явагдсан цувралын гурав дахь тоглолтод Майнерс 82-72 харьцаатай Хүлэгүүдийг буулгаж авснаар цувралыг 3-0 болгож өнгөрсөн улирлын аваргуудыг хар нүхэнд унагав.
ОНЦЛОХ ТОГЛОГЧ: Эрдэнэт Майнерсын импорт тоглогч Пендарвис Уиллиамс өнөөдөр 20 оноо авч багаа оноо авалтаар тэргүүлсэн бол А.Бямбадорж 12 оноо авахдаа холын зайнаас 80 хувьтай шидэж онцгой тоглосон. Мөн Эрдэнэт Майнерс багийн гараа, сэлгээ тун жигд тоглолтыг харуулж багийн сэлгээний тоглогчид нийлээд 36 оноо авсан байна.
ЭРГЭЛТИЙН ЦЭГ: Эхний хагас 39-39 харьцаатай өндөрлөсөн. Гуравдугаар үеийн цаг сүүлийн 7 минут руу орж онооны харьцаа 43-41 байхад Эрдэнэт Майнерс баг Н.Золжаргалын амжилттай гүйцэтгэсэн холын зайн шидэлтээс эхлэлтэй 10-0 run хийж 12 онооны илүү болж чадсан. Үүнээс хойш онооны харьцаа 10-аас доош орохгүй байсаар 82-72 харьцаатай талбайн эздийн ялалтаар дууссан. Хожил авсан Эрдэнэт Майнерс баг өнөөдөр эсрэг багийнхаа бөмбөг алдалтаас 29 оноо авсан бол хожигдол амссан Хасын Хүлэгүүд бөмбөг алдалтаас 9 оноо авсан байна.
Хүлэгүүд эргэн ирэлтээ эхлүүлэх үү, Уурхайчид цувралыг дуусгах уу гэдэг ач холбогдолтой тоглолт маргааш буюу /03.25/-нд UG Arena-д 17:20 минутад эхэлнэ.
