БНСУ-ын “Pinkfong” компанийн “Baby Shark” дуут бүжгийн анимейшн 2015 онд цацагдсаныхаа дараа дэлхий даяар хүүхдүүдийн сонирхлыг татаж, цахим орчинд олноороо даган бүжих сэдэл болсон юм. Өдгөө энэхүү видеоны хандалт “Youtube” платформ дээр 12 тэрбум хүрсэн нь хүүхдийн контентын хувьд түүхэн дээд үзүүлэлт болжээ.
Тус контентыг бүтээсэн “Pinkfong” компани энэхүү томоохон амжилтдаа дөрөөлөн илүү олон үзэгчдэд хүрсэн бүтээл хийхээр төлөвлөж байна. Тодруулбал: тус компани “Nickelodeon Animation”-тэй хамтран алдарт аварга загасныхаа дүрээр бүрэн хэмжээний кино бүтээж байгаа аж.
Түүнчлэн өнгөрсөн оны 12 дугаар сард “Baby Shark”-ийн анхны NFT цуглуулга 30 минутад зарагдаж дууссан амжилтын дараа “Pinkfong” NFT-ийг ашиглах илүү олон арга замыг эрэлхийлж байгаа юм.
“Pinkfong” компани мөн дижитал комик ном, энэхүү дууг сонсож өссөн хүүхдүүдэд зориулан бүтээгдэхүүн гаргахаар төлөвлөжээ.
“Бидний гол өрсөлдөх чадвар контент болон технологид маань байдаг. Энэ хоёрыг хослуулсан бүтээгдэхүүн, бизнесийг бид сонирхож байгаа” хэмээн “Pingfong”-ийн хамтран үүсгэн байгуулагч Ким Мин Сок ярилцлагынхаа үеэр онцолж байлаа.
