2020 онд Сенат энэ асуудлаар доктор Роберт Редфилдийн үгийг сонсож байв
Вашингтонд шинэ Бүгд найрамдахчуудын олонхийн төлөөллийг багтаасан Конгрессын тусгайлан байгуулагдсан хороо коронавирусын гарал үүслийн талаар сонсгол хийж эхлэв.
Өмнө нь АНУ-ын зарим өндөр албан тушаалтнууд Хятадын Ухань хотын лабораторийн аль нэгээс санамсаргүй байдлаар ковидын халдвар алдагдсан байх магадлалтай гэж мэдээлж байсан удаатай..
Гэсэн хэдий ч олон эрдэмтэд энэ дүгнэлтийг шинжлэх ухааны үндэслэлгүй гэж онцолж байгаа бөгөөд Цагаан ордон ч вирусын гарал үүслийн талаар Засгийн газарт нэгдсэн дүгнэлт байхгүй гэдгээ хэлсэн.
Конгрессын хороо эхлээд вирус лаборатораас алдагдсан гэх таамаглалыг анхнаас нь дэмжсээр ирсэн Америкийн Өвчнийг хянах, урьдчилан сэргийлэх төвийн дарга асан доктор Роберт Редфилдийн мэдээллийг сонссон.
Доктор Редфилд хэлэхдээ, түүний үзэж байгаагаар коронавирус байгалийн гаралтай байх магадлалыг шинжлэх ухааны үндэслэлтэй тайлбарлах боломжгүй гэж мэдэгдэв.
Зарим тооцоогоор, Ухань хотын хамгийн олон амьд амьтан, шувуу зардаг зах нь тухайн үед коронавирусын судалгаа хийж байсан дэлхийн тэргүүлэх вирус судлалын хүрээлэнгийн ойролцоо байрладаг бөгөөд тэнд вирус амьтан, хүний хоорондох төрөл зүйл дундын саадыг давсан байх магадлалтай гэж үзэж байна.
Доктор Редфилдийн хэлснээр, тэнд Америкийн татвар төлөгчдийн мөнгөөр яг ийм судалгаа хийж байсан гэжээ.
Өнгөрсөн долоо хоногт Холбооны мөрдөх товчооны дарга Кристофер Врей Хятадын лаборатораас вирус алдагдсан гэдэг нь ковидийн хамгийн их магадлалтай эх үүсвэр гэж үзэж байна гэж мэдэгджээ.
Харин энэ бүхэнтэй зэрэгцэн коронавирусыг судлахад оролцсон олон тэргүүлэх эрдэмтэд лаборатораас алдагдсан гэх таамаглалыг батлах шинжлэх ухааны шинэ нотлох баримт байхгүй гэдгийг мэдэгдээд байна.
Глазгогийн их сургуулийн Вирусын геномик ба биоинформатикийн тэнхимийн эрхлэгч, профессор Дэвид Робертсоны хэлснээр хамгийн үнэмшилтэй таамаглал бол коронавирус байгалийн гаралтай гэх онол юм гэжээ.
Эх сурвалж: ВВС
