Маралмаа гэх хүнд холбогдох хэргийн шийдвэрийн талаар мэдээлэл уншлаа, бодож үзлээ. Хуулийн дагуу л шийдэж.
1) Замын хөдөлгөөний дүрэм зөрчих, осол гаргах бол дангаар гэмт хэрэг биш байдаг. Харин түүний улмаас бусдын эрүүл мэндэд хүндэвтэр гэмтэл учруулах нь гэмт хэрэг байдаг. Иймд шүүх зөвхөн энэ үйлдлийг нь шүүж, ял шийтгэл өгч байгаа гэдгийг ойлгох хэрэгтэй. Өөрөөр хэлбэл, бусад хохирогчдын хувьд эрүүл мэндэд хүндэвтэр гэмтэл учраагүй буюу гэмт хэрэг биш гэдгийг ойлгох хэрэгтэй. Иймд олон машин мөргөсөн юм чинь хүнд ял авах учиртай гэж бодох нь буруу гэмээр байна.
2) Тээврийн хэрэгсэл жолоодох эрхгүй хүн дээрх гэмт хэргийг үйлдэх нь харин хүндрүүлэх бүрэлдэхүүн байхаар хуульчилсан. Гэхдээ энэ нөхцөлд хорих ял (6 сараас 3 жил хүртэл) эсвэл 3 жил хүртэл зорчих эрхийг хязгаарлах ял өгч болохоор хуульчилж. Иймд заавал хорих ял өгөх гэмт хэрэг биш.
3) Анх удаа гэмт хэрэг үйлдсэн, хохирлоо барагдуулсан, тухайн үед тусламж үзүүлсэн зэрэг нь бол гэмт хэргийг хөнгөрүүлэх хүчин зүйлс, үндэслэл гэдгийг энгийн логиктой хүн ойлгох байх. Иймд заавал хорих ял гэхгүй зорчих эрх хязгаарласан нь зөв болж ээ.
4) Жолоодох эрхгүй атал жолооны эрх хассан байна гэж шүүмжилж байх шиг байна. Гэвч энэ бол шүүгч сонголтгүй оногдуулах шийтгэл байхаар хуульчилсан. Ингэснээр Маралмаа гэж хүн ирээдүйн хэдэн жилд жолооны үнэмлэх авах, машин барихыг хязгаарлаж байгаа юм. Иймд энэ бол хоосон, худлаа шийдвэр биш.
Олон нийт шүүхийн шийдвэрийн талаар хэлэлцэж байх нь зөв. Гэхдээ хууль нь ямар билээ гэж харж, хуульчдаа сонсож байгаарай. Хуулийн дагуу шийдсэн бол шүүхийг буруутгах утгагүй. Харин хуулиа өөрчлөх тухай ярьж болно.
Хуульч А.Базар
