Авлигатай тэмцэх “Шувуу” ажиллагааны хүрээнд хуулийн байгууллагад шалгагдах явцдаа гадаад улс руу оргон зайлсан этгээдүүдийн нэрийг ХЗДХ-ийн сайд Х.Нямбаатар танилцуулав.
Тэрбээр “Ерөнхий сайдын албан даалгаврын дагуу мөрдөн байцаалтын явцад оргон зайлсан хүмүүсийг гадаад улсаас авч ирэх чиглэл гарсан. Энэ дагуу ХЗДХ-ийн яамнаас АТГ, ТЕГ, ЦЕГ-т албан бичиг хүргүүлсэн. Хариу ирүүлсэн албан бичигт дурдсанаар нийтдээ мөрдөн шалгах ажиллагаанаас оргон зайлсан 90 хүн байна. Үүнээс авлига, албан тушаалын гэмт хэрэгт шалгагдаж байгаад оргон зайлсан 7 хүн бий. Өнөөдөр үүн дээр Т.Бадамжунай, Н.Удаанжаргал нар нэмэгдэнэ. Энэ хоёр хүнийг яллагдагчаар татах саналыг НПГ-т өнөөдөр хүргүүлж байгаа. Ингээд нийт 92 хүнийг гадаад улсаас авч ирэх чиглэлд тодорхой ажлуудыг зохион байгуулна.
Монгол Улс 23 улстай эрх зүйн харилцан туслалцаа үзүүлэх гэрээтэй. Эдгээр улсуудад эрх зүйн туслалцаа үзүүлээч гэсэн хүсэлтийг явуулах гэж байна. Дээрх иргэд хаана, ямар улс оронд амьдарч байгаа тухай мэдээлэл бидэнд бий.
Эдгээр хүмүүсийн нэрсийг хэлье. Энэ бол нууц зүйл биш. Монгол Улсын Ерөнхий сайд асан Ч.Сайханбилэг, ХААХҮ-ийн сайд асан Т.Бадамжунай, “Тавантолгой төмөр зам” ХХК-ийн гүйцэтгэх захирал асан Н.Удаанжаргал, Замын-Үүдийн цагдаагийн хэлтсийн дарга асан н.Үржинбадам, С.Төмөрбат, П.Болортуяа, Т.Отгонбаатар, Б.Мөнхзул гэх мэт хүмүүс АТГ-т шалгагдаж байхдаа оргон зайлсан” гэлээ.
