Монголын пауэрлифтингийн нэгдсэн холбооны классик пауэрлифтингийн найм дахь удаагийн улсын аварга шалгаруулах тэмцээн Спортын төв ордны А зааланд болж байна. Тэмцээнд 18 аймаг, есөн дүүргийн 300 гаруй тамирчин өсвөр, залуучууд, насанд хүрэгчид, ахмадын ангилалд суулт, таталт, шахалтын төрлөөр өрсөлдөж байгаа бөгөөд энэ тэмцээн тус холбооны 20 жилийн ойн хүрээнд болж буйгаараа онцлогтой юм.
Тэмцээний ерөнхий шүүгчээр паралимпын аварга, дэлхийн дээд амжлтыг эзэмшигч, Хөдөлмөрийн баатар, гавьяат Э.Содномпилжээ ажиллаж байгаа юм. Харин тэмцээний хамгийн залуу оролцогчоор 10 настай Air Sok клубын тамирчин И.Чингүнсанаа тодорсон бол хамгийн ахмад тамирчнаар 78 настай дэлхийн аварга, Ази тивийн гурван удаагийн аварга, ОУХМ Ц.Маамчулуун юм.
