Шүүхийн Шийдвэр Гүйцэтгэх Ерөнхий Газраас өнөөдөр иргэдийн гар утсанд мессэж ирүүлсэн.
Яагаад ийнхүү мессэж илгээсэн талаар ШШГЕГ-ын Шийдвэр гүйцэтгэх албаны ахлах мэргэжилтэн М.Үүлэнсолонгоос тодрууллаа.
- Шүүхийн шийдвэрээр ямар нэг үүрэг хариуцлага хүлээгээгүй иргэдэд үл ойлгогдох мессэж ирсэн талаар тайлбар өгнө үү?
- Шүүхийн шийдвэр биелэлт хангалттай бус, ялангуяа хүүхдийн төлөгдөөгүй тэтгэлэг ихээр хуримтлагдсан зэрэгтэй холбоотойгоор манай байгууллагаас "Хуулиа дээдэлж, үүргээ биелүүлье-Хүүхдийн тэтгэлэг Хүүхдийн ирээдүй" аяныг 2023 оны хоёрдугаар сараас эхлүүлсэн.
Жилийн хугацаанд хэрэгжүүлэх энэхүү аяны хүрээнд оператор компаниуд хамтран ажиллаж, нийгмийн хариуцлагын хүрээнд шүүхийн шийдвэр гүйцэтгэх байгууллагын талаар олон нийтэд мэдээлэл хүргэн ажиллаж байгаа юм.
Шүүхийн шийдвэр гүйцэтгэх байгууллага нь хорих болон хорихоос өөр төрлийн ял эдлүүлэх ажиллагааг хэрэгжүүлэхээс гадна иргэн, захиргааны шүүхийн шийдвэрийн биелэлтийг хангуулж, хохирсон иргэд, хуулийн этгээд, тэтгүүлэгч хүүхдийн эрхийг сэргээн эдлүүлэх чиг үүргийг хэрэгжүүлдэг.
Иргэд хууль, эрх зүйн мэдлэг, мэдээлэл дутмагаас хохирох тохиолдол байдаг. Иймд эрсдэлээс сэргийлж иргэд, олон нийтэд хандсан уриалгыг аяны хүрээнд гаргасныг үүрэн телефоны оператор компаниуд нийгмийн хариуцлагын хүрээнд дэмжиж, үнэ төлбөргүй мэдээлэл хүргүүлсэн.
- Энэ мэдээлэл нь шүүхийн шийдвэрээр ямар нэгэн үүрэг хүлээгээгүй хүмүүст хүртэл очсон нь олон нийтийг бухимдлыг төрүүлээд байх шиг байна?
- Бүх иргэн шүүхийн шийдвэрээр үүрэг хүлээгээгүй боловч тэдний ойр дотнын хэн нэгний эрх хөндөгдсөн эсхүл тэдний үр хүүхдийн тэжээн тэтгүүлэх эрх зарим тохиолдолд хэрэгжихгүй байх магадлалтай.
Иймд хуулийг дээдэлж, хэн нэгний өмнө хүлээсэн үүргээ биелүүлэхийг уриалсан агуулгыг хүн бүрд хүргэхийг уриалсан агуулгыг хүргэхийг зорьсон. Энэхүү мэдээллийг хүргэхэд төсвөөс мөнгө гаргаагүй гэдгийг хэлмээр байна.
Тэтгэлэг төлөгч гурван сараас дээш тэтгэлгийн хуримтлал үүссэн бол Зөрчлийн тухай хуулийн 6.20 дугаар зүйлд заасан хариуцлага хүлээлгэдэг.
Зөрчлийн тухай хуулийн 6.20 дугаар зүйл “Хүүхдийн эрхийг зөрчих” 6-д “... хүүхдийн тэтгэмжийг гурван сараас дээш хугацаанд төлөөгүй нь эрүүгийн хариуцлага хүлээлгэхээргүй бол хүнийг 100 нэгжтэй тэнцэх хэмжээний төгрөгөөр торгох, эсхүл албадан сургалтад хамруулж 7-30 хоногийн хугацаагаар баривчлах шийтгэл оногдуулна” гэж заасан.
2022 оны статистик мэдээгээр хүүхдийн тэтгэлгийн хуримтлалтай 18 иргэнд 1.8 сая төгрөгийн торгох шийтгэл, 36 иргэнд албадан сургалтад хамруулж, баривчлах шийтгэл оногдуулсан байна.
Мөн хүүхдийн тэтгэлгийн хуримтлалтай 4,452 тэтгэлэг төлөгчийн гадаадад зорчих эрхийг түдгэлзүүлснээс 1,406 иргэн хуримтлагдсан тэтгэлгийг бүрэн төлөгдөж гадаадад зорчих эрхийг сэргээжээ.
