2024 онд Ази тивийн ахмадын аварга шалгаруулах тэмцээнийг Монгол Улс түүхэндээ анх удаа зохион байгуулах эрх авсан байна. Монголын шатрын холбооны дэд ерөнхийлөгч А.Энхтуул “Монголын шатрын холбооны удирдлагын багийнхан ахмад шатарчдынхаа захиасыг хариуцлагатайгаар биелүүлж, ирэх жил буюу 2024 онд Азийн Ахмадын аварга шалгаруулах тэмцээний зохион байгуулах эрх авч чадсаныг нийт шатрын зүтгэлтэн болоод ахмад шатарчдадаа дуулгахад таатай байна. Та бүхний минь хөдөлмөр зүтгэлийн үр шимээр өнөөдрийн Монголын шатрын хөгжил энэ түвшинд хүрсэн гэдгийг цохон тэмдэглээд, тус тэмцээнийг зохион байгуулахаар боллоо. Түүнчлэн, өсвөрийн шатарчид маань олон улсын алдартай ахмад шатарчдыг амьдаар харж, үлгэр дуурайл авах сайхан боломж юм” хэмээжээ.
2024 оны Зүүн Өмнөд Азийн аварга шалгаруулах өсвөрийн шатарчдын тэмцээнийг зохион байгуулах эрх авах өрсөлдөөн гурван улсын дунд явагдаж байна.
