Гуравдугаар сарын 15-нд УИХ-ын хаврын чуулган эхэлнэ. Ээлжит чуулганаар нүүрсний хулгайн хэрэгт нэр холбогдсон УИХ-ын гишүүдийн бүрэн эрхийг түдгэлзүүлэх, чөлөөлөх эсэхийг хэлэлцэнэ. Учир нь, нэр бүхий гишүүд өөрийн хүсэлтээр чөлөөлөгдөж шалгуулахаа илэрхийлээд байгаа. Одоогийн байдлаар МАН-ын 7, АН-ын 2 гишүүн дөчин их наядын гэх тодотголтой нүүрсний хэрэгт нэр холбоотой яваа.
АТГ-аас Н.Наранбаатар, Б.Баттөмөр, Ц.Сэргэлэн, Ш.Раднаасэд, А.Адъяасүрэн, Д.Бат-Эрдэнэ нарын долоон гишүүнийг нүүрсний хэргээр шалгаж буйгаа оны өмнө мэдэгдсэн. Үүн дээр УИХ-ын гишүүн Ж.Мөнхбат, УИХ-ын гишүүн, ХНХ-ын сайд асан Т.Аюурсайхан нарын нэр нэмэгдэж нүүрсний хэргээр шалгагдах гишүүдийн тоо 9 болсон юм. УИХ-ын гишүүн Ж.Мөнхбат, Т.Аюурсайхан нарын тухайд сар шинийн өмнө УИХ-ын болон Засгийн газрын гишүүнээс чөлөөлөгдөх хүсэлт гаргасан. Ж.Мөнхбатын хувьд нүүрсний хулгай, мөрийтэй тоглоом, концессын гэрээ зэрэг асуудлаар, Т.Аюурсайхан нь нүүрсний хэрэгт холбогдсон асуудлаараа шалгуулахад бэлэн гэдгээ мэдэгдсэн байдаг.
-Нүүрсний хэрэг УИХ дээр гацах магадал өндөр-
Энэ парламент жилийн өмнө Хөгжлийн банкны хэрэгт холбогдсон нэр бүхий 4 гишүүнээ хамгаалж, бүрэн эрхийг нь түдгэлзүүлэх шаардлагагүй гэдэг шийдвэр гаргаж байв. Өөрөөр хэлбэл ЖДҮ, Хөгжлийн банкны хэргийн түүх нүүрсний хэрэг дээр давтагдах магадлалтай.
Гацах өөр нэг шалтгаан нь Үндсэн хуульд нэмэлт, өөрчлөлт оруулах эрх баригчдын хүсэл юм. Учир нь, УИХ бүрэн бүрэлдэхүүнээрээ байж гэмээнэ Үндсэн хуулийн нэмэлт, өөрчлөлт цаашаа явна. Тиймээс МАН-ын дарга Л.Оюун-Эрдэнийг энэ хүслээр нь барьцаалахын тулд Ж.Мөнхбат, Т.Аюурсайхан нар шударгын дүр эсгэж гишүүнээс татгалзах хүсэлт гаргасан гэх хардлага ч гараад байна.
Түүнчлэн УЕПГ-аас Н.Наранбаатар, А.Адъяасүрэн, Т.Аюурсайхан, Б.Бат-Эрдэнэ нарын бүрэн эрхийг түдгэлзүүлэх саналыг парламентад оруулж ирнэ гэсэн мэдээлэл Сар шинийн өмнө гараад төд удалгүй намжсан. Хэрэв Улсын Ерөнхий Прокуророос дээрх нэр бүхий гишүүдийн нэрсийг эгүүлэн татах саналтайгаар оруулж ирсэн бол УИХ-ын чуулганы хуралдааныг 24 цагийн дотор зарлаж, ажлын 5 хоногийн дотор түдгэлзүүлэх эсэхийг шийдэх байв. Одоогоор нүүрсний хэрэгтэй нэр холбогдсон УИХ-ын 9 гишүүнээс ганцхан А.Адьяасүрэнд эрүүгийн хэрэг үүсгэж, яллагдагчаар татах тогтоол нь гарсан хэмээн Прокуророос мэдээлсэн. Гэхдээ бүрэн эрхийн түдгэлзүүлэх саналыг мөрдөх байгууллагаас гаргаагүй байгаа аж.
Г.Жав
Toim.mn
