Цагдаагийн байгууллагаас IHC койныг анхдагч зах зээлд гаргасан “Их Бит” ХХК-ийн хувьцаа эзэмшигч нар татан төвлөрүүлсэн мөнгийг зориулалтын бусаар зарцуулсан гэх хэргийг шалгаж, үүсгэн байгуулагч О.Мөнхжинг яллагдагчаар татан, 30 хоног саатуулан хорьсон.
Дижитал мөнгө буюу койн нь хамгийн эрсдэлтэй хөрөнгө оруулалт гэдгийг үүсгэн байгуулагч нар өөрсдөө хүлээн зөвшөөрдөг ч иргэдийн хүсэл шунал дээр дөрөөлсөн зар сурталчилгаагаар урхидан багагүй хөрөнгө татан төвлөрүүлсэн хэд хэдэн компани болон түүний хөрөнгө оруулагч этгээдүүдийг шалгаж эхэлжээ. Тухайлбал, “ “Элф Эдүкейшн” ХХК, “Ворлд палас дижитал” ХХК, “Ард Бит” ХХК-ийн үүсгэн байгуулагч, хувьцаа эзэмшигч нарыг шалгаж буй аж.
Үүнээс хамгийн анхаарал татаж буй нь “Ард Бит” ХХК-ийн Ардкойн.
Учир нь, үүсгэн байгуулагч “Ард санхүүгийн нэгдэл”-ийн гүйцэтгэх захирал Ч.Ганхуяг нь МАН-ын гишүүн бөгөөд удирдах албан тушаал ч хашиж байсан нэгэн. “Ард бит” ХХК нь Ардкойныг 2019 оноос “Ард санхүүгийн нэгдэл” ХК болон охин компаниудын бүтээгдхүүн үйлчилгээнд урамшууллын оноо хэлбэрээр зах зээл гаргаж ирсэн бөгөөд хэдэн хэдэн крипто биржүүд дээр бүртгүүлсэн гэж мэдээлсэн байдаг. Нэг төгрөгийн үнэлгээнээс эхэлсэн Ард койн 350 төгрөг хүртэл өссөн нь иргэдэд итгэл үнэмшил төрүүлсэн төдийгүй багагүй хөрөнгө оруулалт ч татсан. Харин одоогийн байдлаар ханш нь огцом унаж, өөрийнх нь 100 хувийн хөрөнгө оруулалттай DAX бирж дээр 18 орчим төгрөг байгаа аж.
