“Зөвлөлдөж шийдье” сэдэвт зөвлөлдөх санал асуулгын дүнгээс гарсан зөвлөмжийг Зөвлөлдөх зөвлөл Улсын Их Хурлын дарга Г.Занданшатарт хүлээлгэн өгсөн билээ. Иргэд тухай бүрийн асуултыг дэмжсэн эсэхийг тус зөвлөмжид дурджээ. Зөвлөмжид эрх зүйн 10 шинэтгэл буюу улс төр, засаглалын тогтолцооны шинэтгэл, эдийн засаг болон нийгмийн бодлогын багц хуулиудад тусгах талаар тусгасан байна. Үүнд,
-Тайван жагсаал, цуглаан хийхэд зөвшөөрөл авдаг байдлыг халах, холбогдох хууль, журмыг өөрчлөх,
-Иргэд үзэл бодлоо чөлөөтэй илэрхийлэх, хэвлэн нийтлэх эрх чөлөөг баталгаатай эдлэх эрх зүйн орчныг бүрдүүлэх,
-Гадаад улсад оршин суугаа Монгол Улсын иргэнд УИХ-ын сонгуульд санал өгөх боломжийг бүрдүүлэх,
-Гадаадад төрж өссөн Монгол Улсын иргэний харьяаллын асуудлыг судалж үзэх,
-Ард иргэдийг төлөөлөн ажилладаг, төрийн хянан шалгах бие даасан тогтолцоог бүрдүүлэх,
-Хөрөнгө орлогоо мэдүүлдэг төрийн албан хаагч зарлагаа мэдүүлдэг болох,
-2019 оны ҮХНӨ-ийн дагалдах хуулиудыг баталж, үр дүнг нь үзэх,
-Үндсэн хуулийг шинэчлэн найруулах шаардлагагүй,
-Парламентын чадавхийг нэмэгдүүлж, төлөөллийн ардчиллыг сайжруулах,
-Улс төрийн намын хөрөнгө, орлогын эх үүсвэр, зарцуулалтыг ил тод болгох, олон нийтийн хяналттай болгох. Энэхүү эрх зүйн орчныг яаралтай бүрдүүлэх,
-Улс төрийн намын хатуу гишүүнчлэлээс татгалзаж, бодлогын нам болгох эрх зүйн орчин бүрдүүлэх,
-ЖДҮ-ийг дэмжих хүрээнд уул уурхайн орлогоос сан бүрдүүлэх,
-Төв банк үндсэн чиг үүргээ хараат бусаар хэрэгжүүлэх баталгааг хангах,
-Засаг захиргааны шинэчлэл хийх саналыг Засгийн газраас УИХ-д өргөн барих,
-Орон нутаг руу шилжин суурьших иргэдэд дэмжлэг үзүүлэх эрх зүйн орчин бүрдүүлэх.
Зөвлөмжөөс гарсан саналуудыг Зөвлөлдөх зөвлөл нэгтгэн гуравдугаар сарын 7-оос өмнө УИХ-д өргөн барих аж.
