“Коронавирус”-ийн халдвар авсан хүмүүс “Omicron” хувилбараар дахин өвчилж байна

Цар тахал эхэлснээс хойш нийт 6.8 сая хүн “коронавирус”-ийн халдварын улмаас амиа алдаад байна

Цар тахлын эхэн үед “коронавирус”-ийн халдвар авсан хүмүүс “Omicron” хувилбар тархахад дахин өвчилж байсныг Вашингтоны их сургуулийн судалгаа харууллаа. Тухайлбал: “Alpha”, “Beta”, “Delta” хувилбараар өвчилж байсан хүмүүс 10 сарын дараа л гэхэд өмнө нь өвчилж байгаагүй хүмүүсээс ердөө 36 хувиар илүү хамгаалалттай байжээ. Хэдий тийм боловч өмнө нь өвчилж байсан хүмүүсийн 90 хувь нь “Omicron” хувилбараар хүндээр өвчлөөгүй аж. Дээрх үр дүнг танилцуулахдаа 19 улсад явуулсан 65 судалгаанд үндэслэсэн байна.

“Коронавирус”-ийн “Omicron”-оос өмнөх хувилбарын халдвар авч байсан хүмүүс өөр хувилбаруудаар өвчлөх магадлал бага байгаа юм.

Цаашид халдварын тархалт дахин эрчимжихээс сэргийлэхийн тулд өмнө нь “коронавирус”-ээр өвчилж байсан иргэд ч вакцинд хамрагдах нь чухал болохыг Вашингтоны Их сургуулийн профессор онцолж байна.

Дэлхийн Эрүүл Мэндийн Байгууллагын тооцооллоор цар тахал эхэлснээс хойш нийт 6.8 сая хүн “коронавирус”-ийн халдварын улмаас амиа алдаад байгаа юм. Шинэ хувилбаруудын эсрэг байгалийн дархлаа хэрхэн хамгаалж байгааг тогтоохын тулд илүү судалгаа шаардлагатайг мэргэжилтнүүд онцолж байна.