Замын хөдөлгөөний удирдлагын төв, Тээврийн цагдаагийн албанаас сар шинийн баярын өдрүүдэд хийх замын зохицуулалт болон замын хөдөлгөөний зохион байгуулалтыг өөрчлөхөд гарсан үр дүнг танилцууллаа. Замын хөдөлгөөний удирдлагын төв ОНӨТҮГ-ын Хөдөлгөөн зохицуулалт, хяналтын хэлтсийн дарга Н.Намуугийн өгсөн мэдээллийг тоймлон хүргэж байна.
-Зайсан тойруугийн замыг нэг урсгалтай болгосноор Багшийн дээд, Энхтайваны өргөн чөлөөнд тээврийн хэрэгслийн нэвтрүүлэх чадвар 28 хувь нэмэгдсэн. Яармагийн гүүр, Дүнжингаравын зам 37 хувиар нэмэгдсэн. Энхтайваны гүүр 48 хувь нэмэгдсэн.
-Зайсан тойруугийн зохицуулалтыг цаашид сайжруулна. Хичээл эхлэх, тарахад явган хүний ачаалал нэмэгддэг. Тиймээс явган хүний гарц, тэмдгийг сайжруулна. Мөн ойр орчмын сургуулиас “School Police” ажиллах шаардлагатай. Түр болон удаан зогсоохгүй. Нийтийн тээврийн хэрэгслийг оновчтой төлөвлөж, автобусны буудлыг шинэчилнэ.
-Өмнө нь оргил ачааллын үед 15-20 цагийн хооронд 25-30 удаагийн таталт хийдэг байсан. Тэгвэл одоо ийм таталтыг аль болох хийхгүй байхаар зохицуулжээ.
-Шинийн 1, 2, 3-нд дугаарын хязгаарлалт хийхгүй.
-Битүүн болон шинийн дөрвөнд дугаарын хязгаарлалт хийнэ.
Мөн ТЦА-ны Урьдчилан сэргийлэх хэлтсийн дарга Б.Очирбат “Жил бүрийн шинийн 1-3-нд зах, гэр хороолол руу чиглэсэн хөдөлгөөн их байдаг. Тиймээс энэ чиглэлд хөдөлгөөнд оролцож байгаа бол аль болох эгнээ байраа солихгүй, гэр хорооллын гудамж дамжиж хөдөлгөөнд оролцохгүй байх шаардлагатай. Ингэснээр зам, тээврийн осол гарч бүх гудамж, зам түгжирч хаагдах хүндрэлтэй.
Үүнээс гадна орон нутаг руу хөдөлгөөн нэмэгддэг. Тиймээс суудлын бүсээ зүүж, шөнөөр явахдаа гэрлээ шилжүүлэх, хэт ядарсан үедээ жолоо барихгүй байхад анхаарах хэрэгтэй. Осол гарах эрсдэлтэй байдаг учир болгоомжтой байх хэрэгтэй” гэлээ.
