Лхагва гарагийн орой Пхеньян хотноо БНАСАУ-ын армийн 75 жилийн ойд зориулсан цэргийн парад болов. Тив хоорондын асар том баллистик пуужингийн урт цуваа Ким Ир Сений талбайг дайран өнгөрөв. Гэхдээ удирдагч Ким Чен Ун зөвхөн зэвсгээ бус бяцхан охиноо дэлхий нийтэд дахин харуулав.
Тэр бол төрийн тэргүүний дунд хүүхэд Ким Жу Аэ бөгөөд одоо арав орчим настай гэж таамаглаж байгаа юм. Тэр сүүлийн гурван сарын хугацаанд тав дахь удаагааолны өмнө гарч байгаа нь энэ юм. Энэ богино хугацаанд охины дүр төрх эрс өөрчлөгдсөн. Тиймээс түүнийг Хойд Солонгосын дараагийн удирдагч гэж нэрлэж байгаа юм.
Ким Жу Аэ өнгөрсөн оны арваннэгдүгээр сард тив алгасах баллистик пуужингийн туршилтын үеэр анх олны өмнө гарч ирсэн юм. Шинэ дүр төрх бүрдээ залуу Ким Жу Ае улам өөртөө итгэлтэй харагдаж байв.
Тэр парадын өмнөх орой тэрээр аавынхаа хамт армийн командлалын хүндэтгэлийн хүлээн авалтад оролцов. Энэ удаад тэрээр албан ёсны хар костюм, цагаан цамц өмсөж, үсээ сайтар самнасан байв.
Зураг бүр дээр тэр зохиомжийнн яг гол хэсэгт, ээж, аав хоёрынхоо дунд байгаа бөгөөд цэргийн өндөр албан тушаалтнууд бүрэн хувцастайгаа ард нь зогсож харагдана.
Өөр нэг сонирхол татсан зүйл бол албан ёсны эх сурвалжийн охины дүр төрхийг тодорхойлохдоо ашигласан үгсийн сонголт юм.
Эхний арваннэгдүгээр сард Умардын төрийн хэвлэлүүд түүнийг Ким Чен Уны "хайртай охин" гэж танилцуулсан бол одоо түүнийг аль хэдийн "хүндэт" охин болсон бөгөөд энэ нь мэдээж хэрэг хамгийн хүндэтгэлтэй үг юм.
Тухайлбал, Ким Чен Ун ирээдүйн удирдагчаар батлагдсны дараанаасаа л "хүндэт нөхөр" гэж нэрлэгдэж эхэлж байв.
"Ариун гэр бүл"
1948 онд Хойд Солонгос улс байгуулагдсанаас хойш Кимийн гэр бүл тус улсыг удирдаж байна. Төрийн суртал ухуулга ёсоор энэ гэр бүл ариун гэр бүлээс гаралтай бөгөөд зөвхөн тэд л БНАСАУ-ыг удирдаж чадна.
Энэ хүрээндээ Ким Чен Ун цаг нь болхоор эрх мэдлийг гэр бүлийн дөрөв дэх үедээ шилжүүлэхийг хүсч байгаа нь ойлгомжтой.
Гэхдээ Ким Жу Аэ үнэхээр өв залгамжлагч болохоор бэлтгэгдэж байлаа гэхэд яагаад ийм эрт, зөрүүд байдлаар дэлхий нийтэд мэдэгдэнэ гэж... Ким Чен Ун өөрөө дөнгөж 39 настай, охин нь харин жаахан хүүхэд хэвээрээ байгаа.
Ким Чен Уныг найман настай байхад нь эцэг Ким Чен Ир түүнийг өв залгамжлагч хэмээн зарласан гэж үздэг. Гэхдээ БНАСАУ-ын одоогийн удирдагчийн нэрийг эцгийг нь нас барсны дараа л олон нийтэд ил болгож байв.
Гэтэл Ким Чен Ун охиноо өөрийн залгамжлагч гэдгийг ийм эртээс мэдрүүлж байгаа нь өнөөгийн улс орны удирдагч өөрөө эрүүл мэндийн асуудалтай, бодож байгаагаас илүү амьдрах хугацаа бага байгаатай холбоотой биш биз гэсэн таамаглалыг төрүүлж байна хэмээн зарим шинжээчид үзжээ.
Гэхдээ мэдээжийн хэрэг, энэ хувилбар батлагдах боломжгүй.
Эх сурвалж: ВВС
