Засгийн газраас 2023 оныг авлигатай тэмцэх жил болгон зарлаж, таван ажиллагаа явуулахаа зарлалаа. Авлигатай тэмцэх шувуу ажиллагаа буюу гэмт хэрэгт шалгагдаж байгаад оргон зайлсан, гадаад руу зугтаад ирэхгүй байгаа албан тушаалтнуудыг эх оронд нь авчирч, шүүхийн өмнө суулгах ажил багтжээ. Энэхүү ажиллагааг зохион байгуулахдаа гаднын улсуудтай байгуулсан эрх зүйн харилцан туслалцаа үзүүлэх гэрээний хүрээнд олон улстай хамтран ажиллах юм байна.
Энэхүү ажиллагаанд хамгийн түрүүнд хамрагдах хүн бол Монгол Улсын Ерөнхий сайд асан Ч.Сайханбилэг юм. Тэрээр 2016 сонгуулийн дараагаас гадаад улс руу яваад өнөөдрийг хүртэл эх орондоо ирээгүй байна. Ч.Сайханбилэгийг Эрдэнэт үйлдвэрийн 49 хувийг худалдсан асуудал болон Оюу толгойн Дубайн гэрээ болон бусад хэрэгт яллагдагчаар татан шалгаж байсан. Мөн АТГ-аас Ч.Сайханбилэгийг шалгаж байгаагаа илэрхийлээд интерполоор эрэн сурвалжилсан ч тэрээр Монгол Улсдаа ирээгүй байгаа юм.
Тэгвэл авлигатай тэмцэх ажиллагааны хүрээнд түүнийг эх оронд нь албадан авчирч, шүүхийн өмнө суулгах ажлыг хуулийнхан ойрын хугацаанд хийх бололтой.
Хууль хяналтын байгууллагаас авлига албан тушаалын гэмт хэрэгт шалгагдаж байхдаа гадаад улс руу орон зайлсан албан тушаалтнуудын нэрийг удахгүй зарлаж, нэн яаралтай эх оронд нь авчрах ажлыг зохион байгуулах юм байна.
